A Revolución dos Caraveis como exemplo para "recuperar a soberanía"
AGE e BNG reivindican o día da revolución portuguesa como un exemplo fronte ás políticas da troika. O Bloque participa nos actos celebrados en Lisboa con motivo do 39 aniversario desta revolta.
Por Galicia Confidencial | Compostela | 25/04/2013 | Actualizada ás 18:29
Alternativa Galega de Esquerda (AGE) e o BNG reivindican a Revolución dos Caraveis que este 25 de abril cumpre 39 anos, e chaman a "recuperar a soberanía para o pobo" fronte ás políticas de recortes da "troika".
O portavoz nacional do Bloque, Xavier Vence, encabezou unha delegación da formación nacionalista que acudiu a Lisboa para celebrar no XXXIX aniversario a revolución lusa invitada polo Bloco de Esquerda, e na que tamén participaron o secretario de Organización, Bieito Lobeira, e a eurodeputada e membro da Executiva, Ana Miranda.
Vence, tras os actos celebrados no Palacio de Sao Bento, puxo de manifesto as reivindicacións dos nacionalistas galegos, que se centran "na necesidade de conquistar a soberanía nacional, a capacidade de decidir, para poder defender a economía produtiva fronte aos mercados e fronte á troika".
"Recuperar o espírito rebelde"
AGE, pola súa banda, lembra nun comunicado que ao sinal marcado pola emisión da canción 'Grândola Vila Morena', Portugal "derrocou a ditadura e iniciou un convulso pero esperanzador período de creatividade política".
"Que logo a xeopolítica e a OTAN reducisen o impulso inicial da Revolución dos Caraveis aos usos das democracias europeas de baixa intensidade non invalida aquela forza popular, aquel bloque social á ofensiva que colocou ás clases dominantes contra as cordas", sinala nun comunicado este grupo.
E tras 39 anos, os portugueses "pelexan por recuperar a soberanía popular que lles foi roubada pola troika e pelexan contra as políticas neoliberais de dereitas que levan cara ao abismo". Por iso, este grupo aposta por "actualizar e recargar o espírito rebelde da Revolución dos Caraveis".
