María Vázquez e Carmen Machi, protagonistas da fin de semana no 'FIOT en pausa'
A actriz galega aparece en escena na estrea absoluta de 'A xente 2.0' e Carmen Machi será unha das protagonistas de 'Prostitutas', unha montaxe teatral que aborda o sempre controvertido tema da prostitución.
Por X.M. Fernández | Carballo | 15/10/2020 | Actualizada ás 09:00
"FIOT en pausa" achégase ao seu final, pero antes de pechar o telón ofreceranos unha fin de semana que está espertando gran expectación polas montaxes teatrais programadas pola Asociación Cultural Telón e Aparte coa colaboración do Concello de Carballo.
Achégase, pois, unha fin de semana ateigada de talento con nome de muller e pezas teatrais nas que se subirán ao escenario, entre os días 16 e 18, actrices como Carmen Machi, María Vázquez, Nathalie Poza ou Carolina Yuste.
Este xoves 15, ás 10.00 horas, abrirase no web www.ataquilla.com a segunda fase de venda de entradas para os espectáculos do FIOT en pausa, de xeito que, seguindo a normativa vixente, habilitarase a posibilidade de reservar butacas individuais ou dobres ata chegar a un máximo do 50% da capacidade do Pazo da Cultura. O público da comarca de Bergantiños terá unha nova ocasión de obter asento para observar, ao vivo, o traballo dun grupo de intérpretes que conta con numerosos galardóns, como premios Max, Goya, Unión de Actores, Feroz ou Mestre Mateo, entre outros. Xunto a este traballo actoral, ademais, destaca o acompañamento na dirección de Prostitución dun dos pratos fortes deste FIOT en pausa: Andrés Lima, gañador do Premio Nacional de Teatro 2019 e catro Premios MAX de dirección de escena.
O venres 16 ás 21:00 h. no Pazo da Cultura, estrea absoluta de A xente 2.0, a primeira montaxe da nova compañía Amorodos Producións, conformada por María Vázquez e Víctor Duplá. Ambos artistas lideran un proxecto que explora novos formatos escénicos e que, nesta ocasión, presenta a adaptación (da propia Vázquez) dun texto de Pérez e Disla, finalista dos XII premios Max. A obra vén sendo unha asemblea na que a partir das intencións de solucionar en grupo problemas comúns e transformar a sociedade cuestionarase "con humor e sen benevolencia o concepto mesmo de participación".
O sábado 17 ás 20:30 h. tamén no Pazo da Cultura a quenda será para a obra Liberto, de Rebordelos Producións. Está dirixida por Tamara Canosa, sobre un texto de Gemma Brió e preséntase como unha das propostas máis sorprendentes dos últimos meses na escena galega. Cun elenco conformado por Rocío González, Cris Iglesias e Lucía Aldao, Liberto pon sobre a mesa un relato silenciado sobre a maternidade, como é a morte perinatal, desde unha óptica feminista. Unha visión valente e singular que foi recoñecida polo propio sector cun total de sete candidaturas nos Premios María Casares neste 2020.
E xa o domingo 18, broche de ouro para pechar o festival deste ano. Ás 20:30 h. chega ao Pazo da Cultura un espectáculo de teatro-documental-musical "intenso, cru e amargo, pero tamén de humor feroz". Trátase de Prostitución, unha montaxe dirixida por Andrés Lima “que nace na rúa e chega ao escenario”. O propio Lima, xunto a Albert Boronat, asina unha dramaturxia na que o reparto se mergulla nun mundo ateigado de controversia. A través de textos e testimonios reais, e un proceso de investigación no que participaron tanto o equipo técnico como artístico, as galardoadas Carmen Machi, Nathalie Poza e Carolina Yuste pretenden, a través da ficción e acompañadas da música ao vivo, dar voz a quen consideran protagonista: as prostitutas.
