A Xunta lánzase á caza dos fondos de recuperación cun proxecto non consensuado coa oposición
A portavoz do BNG, Ana Pontón, criticou a "falta de ideas" das iniciativas que hoxe serán achegadas ó Estado e posteriormente á Comisión Europea.
Por E.P. | SANTIAGO DE COMPOSTELA | 15/10/2020 | Actualizada ás 10:10
A Xunta enviará ao Goberno este xoves, 15 de outubro, os proxectos galegos cos que se busca optar aos 140.000 millóns de euros do fondo europeo de recuperación que van para España. O vicepresidente segundo e conselleiro de Economía, Francisco Conde, subliña que con estes proxectos búscase "a recuperación da crise" e do emprego, a través dunha "transformación económica e social" fronte ao impacto do covid-19.
Tras o "punto de partida" de trasladar esta semana estes proxectos ao Goberno de España, a partir de aí o Estado deberá presentar o Plan Nacional de Recuperación e Resiliencia, que será avaliado pola Comisión Europea en decembro. Posteriormente, a Comisión Europea aprobará en xaneiro de 2021 o regulamento comunitario para a posta en marcha destes fondos europeos de recuperación. Será a partir de abril de 2021 cando se porán a empezar a desenvolver.
Conde destaca que en Galicia se parte cun "traballo feito" e "con garantías para responder os criterios que está a establecer España dentro deste borrador de plan nacional", á vez que defendeu a colaboración público-privada.
INICIATIVAS GALEGAS
En concreto, as iniciativas galegas "maduras" que se incluirán no borrador que o Estado levará a Europa inclúen catro proxectos tractores: unha planta de hidróxeno verde; un centro para o impulso da economía circular; a fabricación de fibras téxtiles a partir de madeira e a instalación de nova potencia renovable.
A isto súmanse tres iniciativas transversais centrada en cadeas loxísticas sustentables para o transporte, un centro de innovación en tecnoloxías renovables de hidróxeno e un laboratorio dixital para profundar en sistemas 4.0. No Instituto Galego de Promoción e Emprego (Igape) crearase unha oficina de proxectos tractores, que será a que tramitará estas iniciativas ante o tecido económico.
Os proxectos desenvoltos pola Xunta de Galicia para optar ós fondos de recuperación veñen de recibir as críticas da oposición. Ana Pontón afeaba na xornada do mércores a "falta de ideas" da administración Feijóo para captar os fondos da Unión Europea e afeaba ó executivo galego que non situara un obxectivo mínimo de ingresos a recibir.
