Luz láser e tecnoloxía LED para tentar evitar á néboa na A-8 entre Mondoñedo e A Xesta

O Ministerio de Transportes, Mobilidade e Axenda Urbana iniciou experimentos en campo con prototipos para buscar solucións que reduzan o efecto adverso da néboa na circulación viaria no tramo da A-8 comprendido entre Mondoñedo e A Xesta. Entre eles, hai proxectos con luz láser e tecnoloxía LED.

Nun comunicado, o Ministerio lembrou que a finais de 2019 formalizou sete contratos de servizos de investigación e desenvolvemento da Compra Pública Precomercial (CPP) cuxo importe total ascendeu a 5,64 millóns de euros.

En concreto, a finalidade de tres deses contratos foi o desenvolvemento de solucións innovadoras baseadas en sistemas de axuda á condución en situacións de néboa. Mentres, os catro proxectos restantes enfocáronse no desenvolvemento de solucións innovadoras mediante sistemas de illamento, eliminación ou desprazamento deste fenómeno meteorolóxico.

A Compra Pública Precomercial (CPP) está cofinanciada nun 80% polo Programa Innocompra do Ministerio de Ciencia e Innovación a través do Fondo Europeo de Desenvolvemento Rexional 2014-2020.

FASES DE DESENVOLVEMENTO

Deste xeito, a CPP desenvólvese en competencia por fases de carácter eliminatorio. As dúas etapas temporais contempladas no prego son a de demostración da viabilidade das solucións propostas, finalizada, e a de construción e experimentación en campo a escala real.

Para efectuar esta segunda fase, utilízanse catro prototipos seleccionados na fase 1. Así, verificarase o correcto funcionamento dos desenvolvementos teóricos nunha contorna real con condicións de néboa características do tramo comprendido entre Mondoñedo e A Xesta.

As propostas que superaron a primeira fase inclúen un sistema de balizamento lateral da vía con luz láser e outro de sinalización horizontal con tecnoloxía LED proxectada sobre a calzada. Así mesmo, desenvolvéronse un sistema de difusión automático por aspersores de materiais higroscópicos e unha combinación de barreiras estáticas e barreiras dinámicas que empregan dispositivos fluído-mecánicos para actuar sobre a néboa.

Tras a validación da tecnoloxía ensaiada, contratarase a construción dos sistemas antinéboa seleccionados para resolver a problemática do tramo indicado da A-8.