Tres deputadas en corentena por COVID delegan o seu voto para o pleno que empeza este martes no Parlamento
A delegación de voto por situación de confinamento derivado da covid-19 é unha posibilidade regulamentaria que se aprobou no pasado pleno da Cámara autonómica e que pretendía garantir a actividade lexislativa no caso de que se producise un brote por coronavirus.
Por E.P. | SANTIAGO DE COMPOSTELA | 19/10/2020 | Actualizada ás 16:31
Tres deputadas do Parlamento de Galicia, entre elas a conselleira de Medio Ambiente, solicitaron delegar o seu voto nos seus respectivos portavoces na Cámara galega ao atoparse en corentena seguindo o protocolo covid-19.
Concretamente, trátase da conselleira de Medio Ambiente, Ángeles Vázquez, que permanecerá en illamento en domicilio debido a que mantivo contacto estreito coa deputada do PPdeG por Ourense Marisol Díaz Mouteira, que deu positivo no test de coronavirus.
Ademais, seguindo tamén o protocolo covid-19, a parlamentaria tamén por Ourense Marina Ortega (PSdeG), que é vicesecretaria da Mesa da Cámara, mantén por segunda vez un confinamento preventivo por un positivo na súa contorna, segundo confirmaron fontes parlamentarias a Europa Press.
Nos dous casos, as deputadas do PPdeG delegaron o seu voto no portavoz parlamentario, Pedro Puy, que tamén votou en nome da deputada Sandra González, do PP de Lugo, en situación de permiso de maternidade. Tamén Marina Ortega delegou o seu voto no portavoz parlamentario do seu grupo, Gonzalo Caballero.
CO NOVO REGULAMENTO
A delegación de voto por situación de confinamento derivado da covid-19 é unha posibilidade regulamentaria que se aprobou no pasado pleno da Cámara autonómica e que pretendía garantir a actividade lexislativa no caso de que se producise un brote por coronavirus.
Aínda que este tres ausencias, neste caso, non supuñan unha alteración das maiorías que rexen a cámara e tampouco bloqueaban a actividade por falta de quórum, co recentemente reformado regulamento a votación non terá consecuencias.
Ademais, as novas normas parlamentarias tamén establecen a posibilidade de establecer unha participación telemática, pero este aspecto aínda non foi desenvolvido.
"ATÓPASE BEN"
Anxos Vázquez, que segundo fontes da consellería "atópase ben", é a segunda conselleira do Executivo autonómico que se ve obrigada a illarse por contacto cun positivo en coronavirus.
Previamente, o pasado mes de setembro, foi o titular de Educación, Román Rodríguez, o que anunciaba que tiña que gardar corentena tras o contacto cun positivo na súa contorna persoal.
