A Covid entra na planta de Oncoloxía do Hospital de Pontevedra e deixa seis positivos
O Sergas di que se intensificou a limpeza e desinfección da sala de enfermaría e o control de hospitalización do servizo de Oncoloxía.
Por Europa Press / Redacción | SANTIAGO DE COMPOSTELA | 20/10/2020 | Actualizada ás 13:53
Seis pacientes do servizo de Oncoloxía do Hospital Provincial de Pontevedra atópanse en corentena ao dar positivo en coronavirus.
A detección deste brote obrigou a activar o protocolo preventivo covid vixente na área Sanitaria de Pontevedra e O Salnés e a trasladar a todos os afectados, nas últimas horas ás dependencias de hospitalización covid habilitadas desde o inicio da pandemia no Hospital Montecelo.
Segundo informa o Servizo Galego de Saúde (Sergas), tras a detección do primeiro positivo neste servizo do Hospital Provincial, procedeuse ao cribado con probas PCR ao resto de pacientes, así como do persoal desa unidade de hospitalización.
Tamén levou a cabo unha limpeza intensiva e unha desinfección nas habitacións e espazos comúns, segundo revela o informe técnico que efectuou sobre este brote o servizo de Medicina Preventivo da área Sanitaria, que analiza e efectúa seguimento de cada situación.
O Sergas apunta que, durante a mañá deste martes, intensificouse a limpeza e desinfección da sala de enfermaría e o control de hospitalización do servizo de Oncoloxía, que mantén a súa continuidade asistencial recibindo controis preventivos de maneira programada.
