O Goberno acepta estudar a proposta do toque de queda, pero habería que declarar antes o estado de alarma

O ministro de Sanidade, Salvador Illa, confirmou este martes que o Goberno non aprobará unha prórroga do estado de alarma na Comunidade de Madrid, que decaerá o vindeiro sábado. Ademais, estudará con todas as comunidades autónomas a fórmula do toque de queda para evitar a propagación do coronavirus, aínda que avisou de que esta medida requiriría a declaración de estado de alarma nos territorios afectados.

Na rolda de prensa posterior ao Consello de Ministros, Illa apuntou que a cifra de contaxios na Comunidade de Madrid descendeu despois de 21 días de medidas "moi estritas" e, aínda que os datos aínda son "altos" e non "tranquilizadores", o Executivo non prorrogará o estado de alarma e estudará xunto ao Goberno de Isabel Díaz Ayuso as medidas a adoptar.

En canto á posibilidade de decretar un toque de queda, aceptou que é unha medida que se está aplicando noutros países europeos e dixo que se estudará con todas as comunidades autónomas. Iso si, subliñou que requiriría do estado de alarma e por tanto debería ser aprobado "coa certeza" de que conta con suficiente apoio dos grupos parlamentarios para saír adiante no Congreso dos Deputados se tivese que aplicarse durante máis de 15 días.

"Se decidísemos ir por ese camiño sería moi importante saber que grupos, e especialmente o PP, estarían dispostos a dar o seu apoio no Congreso", apremou o ministro, que con todo recoñeceu que non tivo ningún contacto respecto diso cos 'populares' e a súa interlocución limítase aos conselleiros de Sanidade das comunidades autónomas.

Illa insistiu en que o toque de queda é só unha opción das moitas que poderían porse en marcha para evitar a propagación da pandemia e deixou aberto tanto o marco territorial no que se aplicaría como as súas concrecións respecto dos horarios ou outros aspectos.

DESCARTA O MANDO ÚNICO

O ministro avisou de que as próximas semanas serán "moi duras" e destacou as medidas que están a adoptar as comunidades autónomas, algunhas delas "moi importantes e contundentes". Así, explicou que o Goberno non quere "substituír" ningunha administración, senón exercer un papel de coordinación.

"Non é cuestión dunha comunidade autónoma, temos que actuar todas en coordinación", insistiu antes da reunión do Consello Interterritorial de Saúde que se celebrará o vindeiro xoves. Ademais, rexeitou a posibilidade de volver ao mando único por parte do Executivo porque o seu obxectivo non é "invadir" as competencias de ningunha outra administración, senón "coordinalas".