Por E.P. | Pontevedra | 22/10/2020 | Actualizada ás 15:00
O Concello de Pontevedra estableceu un operativo especial con motivo das festividades de Defuntos e Todos os Santos no que recomenda que as visitas non excedan un tempo de estancia de 30 minutos no cemiterio de San Mauro.
A concelleira Carme Fouces explicou que o goberno local estaba á espera "dunhas prometidas instrucións que a Xunta de Galicia dixo que ía sacar", pero o Concello decidiu actuar e organizar o seu propio operativo para o cemiterio de San Mauro, o máis grande do municipio.
Non se establece un límite de capacidade pero si se apela ao "sentido común" nos camposantos para que non se xunten demasiadas persoas en días de moita afluencia. "En Pontevedra somos xente moi razoable e se o recomendamos, seguro que o cumprimos sen prohibir", dixo Fouces.
Ademais, dispuxéronse unhas marcas para sinalizar os itinerarios de circulación por todo o percorrido dentro do cemiterio.
Tamén se habilitará unha única porta de acceso peonil e disporase un teléfono para avisar a un funcionario municipal para que permita o acceso aos vehículos que leven persoas con problemas de mobilidade.
Non se admitirá o paso a mascotas, tampouco estará permitido o acceso con alimentos e o 1 de novembro estarán pechadas todas as billas de auga polo que non haberá auga corrente para encher floreiros ou facer a limpeza. Este servizo estará operativo o resto do mes.
O cemiterio de San Mauro non conta con dispensadores de hidroxel, polo que se recomenda ás persoas que acudan ao recinto que leven a súa propia solución hidroalcohólica para a desinfección de mans.
OUTROS CEMITERIOS
Nos catro cemiterios municipais restantes haberá unhas indicacións na porta cuns carteis que expliquen as medidas sanitarias básicas e xenéricas, chamando á responsabilidade persoal para o seu cumprimento.
Ademais, lembrarase que "o mes de novembro é o Mes de Santos e non é necesario que se aglomeren todos ese día nos cemiterios, senón que se reparta todo o posible a visita", sobre todo no caso das persoas de maior idade ou en situación de risco "que procuren non ir ese día".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.