Sen pistas do mozo de 17 anos desaparecido de Allariz hai unha semana
O rapaz xa fuxira doutros centros de Ávila e Madrid.
Por Europa Press / Redacción | SANTIAGO DE COMPOSTELA | 23/10/2020 | Actualizada ás 11:40
As forzas e corpos de seguridade tratan de localizar a un mozo de 17 anos que marchou o pasado venres, 16 de outubro, dunha casa de menores na que estaba de paso no municipio de Allariz (Ourense).
Así o informaron a Europa Press fontes da Garda Civil, que explicaron que o mozo levaba "cinco horas" nesa casa de paso habilitada pola Xunta para menores antes de marchar. As mesmas fontes sinalaron que se trata dun mozo "reincidente" que xa se marchou previamente doutros centros en Ávila e Madrid e estaba en Allariz de paso, xa que o seu destino era A Coruña.
Por iso, os corpos e forzas de seguridade foron avisados da situación deste menor para localizalo, pero non se habilitou un dispositivo de procura activa.
Ademais, a Policía Nacional subiu ás súas redes sociais unha mensaxe no que pide colaboración para localizar ao menor e solicita a aquelas persoas que o puidesen ter visto que chamen ao 091, ao 062 ou ao 112.
