Importante suba das persoas con covid hospitalizadas en Galicia que superan as 400
Baixan os pacientes ingresados nas UCI.
Por Fermín Paz | SANTIAGO DE COMPOSTELA | 24/10/2020 | Actualizada ás 12:00
As persoas con covid-19 ingresadas en hospitais en Galicia experimentaron nas últimas 24 horas un importante repunte, con 36 hospitalizados máis, co que a cifra alcanza os 409. Deles, 46 están en UCI --dúas menos que hai 24 horas-- e 363 noutras unidades de hospitalización --38 máis--.
Así se desprende na información actualizada na web da Consellería de Sanidade na mañá deste sábado, con datos recolleitos ata as 18,00 horas do xoves. Segundo eles, a área sanitaria con maior número de ingresados é a de Ourense, Verín e O Barco que, con todo, continúa a súa tendencia á baixa. En concreto, ten 107 pacientes covid ingresados --catro menos--, dos que 12 están en UCI --uno menos--.
Pola contra, a área que experimenta un maior repunte é a de Pontevedra e O Salnés, onde os hospitalizados aumentaron ata os 50 --13 máis que hai 24 horas--, dos que sete permanecen na UCI. Pola súa banda, na área de Ferrol os hospitalizados con covid creceron ata o 28 --nove máis que os comunicados o venres--, aínda que os pacientes en UCI mantéñense no tres.
Na área de Vigo aumentan a 57 os pacientes con covid-19 hospitalizados --seis máis--, dos cales sete permanecen en UCI; e na área de Santiago e O Barbanza tamén se incrementan en seis, ata os 74 hospitalizados, oito deles en UCI --un máis--.
Así mesmo, na área da Coruña e Cee soben a 69 os pacientes con covid hospitalizados --catro máis que hai 24 horas--, dos que oito están en coidados intensivos --un menos--. Finalmente, na área de Lugo, A Mariña e Monforte, as persoas con covid-19 hospitalizadas increméntanse a 24 --dúas máis--, das que só unha se atopa en UCI --unha persoa menos que as comunicadas o venres--.
