Por Europa Press / Redacción | SANTIAGO DE COMPOSTELA | 25/10/2020 | Actualizada ás 18:28
A portavoz nacional do BNG, Ana Pontón, saudou este domingo que o novo estado de alarma sexa "máis descentralizado" que o anterior para conter a pandemia da COVID-19, pero criticou que o presidente do Goberno central, Pedro Sánchez, pretenda pedir ao Congreso unha prórroga de seis meses en lugar de facelo cada 15 días.
"En circunstancias excepcionais é máis necesario que nunca o funcionamento normalizado da democracia e do poder Lexislativo, que debe estar a funcionar pero tamén verificando que todo se faga de maneira correcta", explicou, en declaracións aos medios.
A líder do Bloque expresou que a declaración este domingo do novo estado de alarma "deixa en evidencia que era posible" unha forma de xestionar "máis descentralizada", posto que esta vez serán os presidentes autonómicos as autoridades delegadas.
Neste contexto, Pontón, como líder da oposición galega, pediu ao presidente da Xunta, Alberto Núñez Feijóo, que compareza "de maneira urxente" no Parlamento de Galicia "nun pleno monográfico" para informar as medidas que adoptará ante a segunda onda e no marco dun estado de alarma cuxas principais decisións estarán en mans das comunidades.
"O Parlamento debe achegar e colaborar para facer fronte a un virus que ameaza as nosas vidas e a nosa economía", engadiu Pontón.
RESPOTA DE FEIJÓO
Pola súa banda, o presidente galego agardará a este luns para dar conta da súa postura contraria a esta medida tras o encontro que manterán o xefe do Executivo, Pedro Sánchez, e os líderes autonómicos na XXIII Conferencia de Presidentes. A reunión, que se desenvolverá de maneira telemática, está prevista para abordar os criterios de repartición dos fondos europeos que chegarán a España e contará ademais coa presenza virtual da presidenta da Comisión Europea, Ursula von der Leyen.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.