Case medio cento de colectivos e entidades rexeitan o proxecto urbanístico das Percebeiras na Coruña

Case medio cento de colectivos e entidades, un total de 46 ata este luns, asinaron as alegacións ao documento ambiental estratéxico polo proxecto urbanístico das Percebeiras, no barrio coruñés de Labañou. 

Entre os asinantes, están, entre outros, a Federación de Asociacións de Veciños da Coruña e área metropolitana, distintas asociacións veciñais, a ANPA do colexio Emilia Pardo Bazán ou o grupo naturalista Hábitat.

A asociación veciñal de Labañou afirma que este apoio supón "a demanda dun cambio na ordenación urbanística para eses terreos e para o conxunto do bordo litoral da cidade", indica tras reivindicar espazos verdes e públicos na zona.

Pola súa banda, o grupo municipal de Marea Atlántica rexistrou este luns un documento de alegacións a este plan especial de Labañou, que prevé a construción de 371 vivendas na parcela das Percebeiras, "en pleno bordo litoral", remarca.

"A Coruña xa ten 20.000 vivendas baleiras, segundo o INE, e non necesita ladrillazos, senón rehabilitar o parque residencial e polo a disposición de quen o necesita".