As farmacias ourensás defenden os test encargados pola Xunta: "somos referencia noutras provincias"
Di que se realizan máis de 6.000 test en dúas semanas para detectar casos de asintomáticos de Covid.
Por Europa Press / Redacción | OURENSE | 02/11/2020 | Actualizada ás 10:21
A rede de farmacias comunitarias da provincia de Ourense que participa no estudo epidemiolóxico promovido pola Consellería de Sanidade para detectar posibles casos de asintomáticos de coronavirus entre a poboación realizou, desde o pasado 16 de outubro, máis de 6.000 test rápidos nas súas instalacións.
Así o informou o Colexio oficial de Farmacéuticos de Ourense nun comunicado, no que puntualizado que a iniciativa, que seguirá en vigor "polo menos durante todo o mes de novembro", logrou unha adhesión do 63 por cento das farmacias emprazadas nestes municipios "e é susceptible de chegar a unha poboación diana dunhas 140.000 persoas", sinalou.
"Esta cifra evidencia o éxito dunha iniciativa na que participan 51 farmacias de varios municipios da provincia, entre eles algúns dos máis afectados pola incidencia de Covid-19 como son Ourense, Boborás, O Irixo, Barbadás, O Carballiño e O Barco de Valdeorras", subliñou.
Respecto diso, a entidade colexial lembra que "se trata dunha medida pioneira en España" cuxa misión é "contribuír a frear a curva de contagios na provincia", tal e como sinala o presidente do Colexio de Farmacéuticos de Ourense, Santiago Leis Vence, que "moi pronto será replicada noutros territorios españois". "A participación neste estudo converteu a Ourense en referencia para moitos farmacéuticos doutras provincias e xerou unha gran expectación mediática", engade Leis Vence.
SEGURIDADE GARANTIDA
A entidade colexial subliñou que a "seguridade da iniciativa para os farmacéuticos está garantida en todo momento" posto que se articulou, explica, "un estrito procedemento en cooperación coa Consellería de Sanidade".
Ademais, apuntaron as mesmas fontes, a iniciativa contou co respaldo e apoio do Consello Xeral de Colexios Farmacéutico de España e dos Colexios oficiais de Farmacéuticos da Coruña, Pontevedra e Lugo.
