Por E.P. | Santiago de Compostela | 02/11/2020 | Actualizada ás 16:49
A xunta de goberno local de Santiago aprobou inicialmente a modificación da ordenanza fiscal que eximirá os locais de hostalaría de tributar polas terrazas en 2021. Pola súa banda, o goberno de Ames estende ao primeiro semestre do ano que vén esta mesma medida, xa aplicada para 2020.
O alcalde compostelán, Xosé Sánchez Bugallo, destacou que a decisión deriva do "compromiso adquirido" coa Asociación de Hostalería de Compostela e que deberá ser ratificada en pleno para a súa aprobación definitiva.
A reunión do goberno local compostelán tamén acordou a tramitación dun expediente modificativo de crédito para o plan de sustentabilidade turística.
Así, incluirá unha nova aplicación orzamentaria nun novo proxecto de gasto que se creará desde a oficina de orzamentos, que conta con 3 millóns de euros, financiados a partes iguais entre o Goberno central, a Xunta e o Concello.
En concreto, a achega municipal será de 1 millón dividido en tres anualidades: 200.000 euros en 2020, 400.000 en 2021 e 400.000 en 2022.
Pola súa banda, Ames tampouco cobrará as taxas de utilización da vía pública con mesas e cadeiras ao longo do primeiro semestre de 2021, "compromiso" que afectará, segundo destaca, ao sector hostaleiro e "algúns comercios".
Resalta que esta axuda se engade á derrogación da ordenanza fiscal de instalación de postos no mercado de rúa para 201 e á condonación de ambas as taxas do ano 2020.
"A situación da hostalaría, lonxe de recuperarse nesta nova etapa, acaba de sufrir un novo golpe coas restricións de mobilidade que están a causar grandes perdas e o peche de establecementos", lamenta o Consistorio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.