Por Galicia Confidencial | SANTIAGO DE COMPOSTELA | 04/11/2020 | Actualizada ás 09:00
Os grupos municipais do PSOE e o PP en Pontedeume votaron en contra de levar os verquidos acontecidos no Eume á Fiscalía. Así aconteceu no pleno mensual do concello, celebrado o pasado xoves 29, no que o grupo local do BNG propuxo unha dúas mocións a respecto do suceso ambiental, ambas as dúas rexeitadas tanto polo PSOE, que gobena con maioría absoluta, como polo PP.
As propostas do BNG ían dirixidas, por un lado, a tentar esclarecer a orixe dos verquidos detectados semanas atrás no encoro do Eume. Estes provocaron unha turbidez ata 100 veces superior á habitual no río, feito que levou ó Concello a prohibir ós veciños o consumo de auga da traída polo evidente perigo para a saúde.
Ante estas circunstancias, o grupo local dos nacionalistas instou ó alcalde socialista a levar o caso á Fiscalía para averigüar se, finalmente, os verquidos tiñan relación coa actividade de Endesa na zona, como sinalaron diversas asociacións ecoloxistas. Porén, tanto o grupo socialista como o popular votaron en contra dunha proposta que, como remarca Luís Pena, portavoz do Bloque na localidade: "só pretendía recoller máis información sobre o acontecido".
O mesmo curso seguiu a segunda proposta do BNG. A formación nacionalista demandou ó Concello que manobrara para perdoar ós veciños o custe da factura da auga correspondente ós 10 días que esta non foi potable. PSOE e PP, con todo, volveron a rexeitar a moción dos nacionalistas.
250 MILLÓNS PARA "SALVAR" O RÍO
Na mesma xornada, a portavoz nacional do BNG achegouse ás Fragas do Eume para propoñer a posta en marcha dun plan de recuperación do entorno que estaría dotado cun orzamento de 250 millóns de euros. O obxectivo do chamado 'Plan Eume' sería avanzar cara "a recuperación ambiental e o impulso económico e social deste enclave natural".
A portavoz nacional do BNG detallou que o primeiro dos ámbitos desenvolveríase neste ano 2020 e no próximo 2021, coa "rexeneración do río" xa que "o primeiro que hai que facer é salvalo". Incluiría "tomar as medidas necesarias para a recuperación da súa contorna, coa realización dunha auditoría que mostre cal é a situación real e que ofrecerá logo as claves para a seguinte fase".
Segundo Pontón, deberá de ser a Xunta a encargada de realizar este traballo e así esixir "responsabilidades a Endesa, coas compensacións necesarias, porque quen contamina non se pode ir de rositas sobre todo cando obtén grandes beneficios". En canto ao Plan de actuación, a desenvolver ata o ano 2025, Pontón cifrouno en "250 millóns de euros", que deberán de ser achegados por Endesa, Xunta e outras administracións, "elaborado nun amplo proceso de participación social e institucional, coa implicación de todos os concellos afectados, así como os axentes económicos e sociais afectados". En canto á maneira de xestionar o mesmo, o BNG propón a fórmula de "un consorcio ou dun convenio" coa participación dos municipios e da Deputación da Coruña.
PLAN REITOR
Segundo Ana Pontón, "este plan debe recoller actuacións de conservación e recuperación do patrimonio natural e cultural, actuacións de dinamización socioeconómica, de promoción, divulgación e participación e investimentos en mellora de infraestruturas e servizos". Ademais, apuntou que esta proposta "debe de ir acompañada do Plan reitor de uso e de xestión do Parque natural das Fragas do Eume, sen aprobar polo Goberno do PP a pesar de transcorrer décadas desde a declaración como espazo natural" desta zona que aglutina a cinco municipios: As Pontes, A Capela, Cabanas, Pontedeume e Monfero.
A portavoz do BNG aproveitou a súa presenza na zona para criticar a situación na que está o río Eume, "que ten --esgrimiu-- en Endesa o seu máximo responsable e na Xunta un cómplice necesario, xa que se dedicou durante anos a miar para outro lado". Neste escenario, aludiu á situación vivida recentemente, coa turbidez da auga, que impediu durante máis de dez días o seu consumo polos veciños de Pontedeume, e sinalou que "é a punta do iceberg dun desastre ambiental anunciado, porque non se tomaron medidas nin se actuou con decisión para frear a contaminación e esixir responsabilidades".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.