Por Europa Press / Redacción | SANTIAGO DE COMPOSTELA | 03/11/2020 | Actualizada ás 17:02
O Grupo Popular usará a súa maioría parlamentaria para que o Parlamento de Galicia se sitúe en contra do decreto de aprobado xeral na educación, impulsado polo Ministerio que dirixe Isabel Celaá, e que xa foi rexeitado pola Xunta de maneira contundente.
É máis, tras coñecerse a medida do Executivo central, o Goberno autonómico anunciou que "corrixiría" as "debilidades" do decreto cunhas "normas propias" de desenvolvemento co fin de "preservar a calidade do sistema educativo galego e "a cultura do esforzo".
Así figura na nota de prensa emitida pola Consellería de Educación o pasado 16 de outubro día en que, precisamente, o PPdeG tamén rexistrou na Cámara galega unha proposición non de lei para rexeitar de plano este decreto.
A iniciativa presentada polos populares, que pretende un posicionamento do Lexislativo galego á vez que apoia a acción da Xunta, será debatida no próximo pleno da Cámara, a semana que vén, como anunciou o secretario xeral do PP galego, Miguel Tellado, na rolda de prensa posterior á xunta de portavoces.
"Esta norma rompe coa función do sistema educativo como xerador de igualdade de oportunidades e mingua a súa calidade", defendeu o conselleiro de Educación, Román Rodríguez, uns argumentos que traslada tamén o PPdeG na súa iniciativa.
Ademais, o titular da carteira educativa galega xa enviou unha queixa formal á ministra Celaá na que "se lamentaba a toma desta decisión de forma unilateral e sen abordala previamente coas comunidades autónomas".
PROPOSICIÓN NON DE LEI
A proposición non de lei é declarativa e unicamente ten como aspiración fixar a postura do Parlamento respecto diso. O texto resolutivo di que a Cámara "declara a súa posición contraria a que, a través dun real decreto-lei que ignora o previsto na normativa orgánica que non foi pactado coas comunidades, o Ministerio de Educación decida baixar o nivel e os requisitos para que un alumno aprobe, promocione ou titule no curso 2020-2021 con independencia de materias suspensas".
Así, sostén que esta medida "non é acorde coa situación actual do sistema educativo" e "suprime a función de educación como xeradora de igualdade de oportunidades no alumnado". Os grupos da oposición poderán presentar emendas antes do seu debate a semana que vén.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.