O Concello de Pontedeume lembra que foi o primeiro en denunciar a contaminación no Eume

O Concello de Pontedeume anunciou que denunciará a Endesa ante os tribunais cando teña as conclusións da investigación posta en marcha para esclarecer os vertidos no río Eume. Deste xeito, quere aclarar os feitos e desmentir o publicado polo BNG, que dixo que PPdeG e PSdeG votaran para evitar unha investigación sobre o acontecido.

O Concello de Pontedeume, gobernado polo PSdeG, lembra que o BNG propuxo que se denunciase xa ante a Fiscalía de Medio Ambiente o sucedido no río sen ter estudos previos de ningún tipo. Así, destaca que o dia 14 de outubro o propio alcalde de Pontedeume, Bernardo Fernández, informou de que dende o Concello se remitiran sendos escritos de denuncia ante a Consellería de Medio Ambiente e o Ministerio de Transición Ecolóxica, ás que se sumaba a realizada o día 5 ante Augas de Galicia.

"Presentáronse estas denuncias para que estes organismos, que son os que teñen competencias na materia e os medios para poder investigar este suceso, aclarasen a orixe do problema, as posibles consecuencias sobre o medio, e os posibles responsables, para iniciar posteriomente as accións oportunas ante os tribunais", indica o concello nun comunicado.

Por iso, critica ao BNG por pretender que o Concello presente perante a Fiscalía unha denuncia "sen ningún tipo de proba que acredite un dano ecolóxico no ecosistema e sen que se identifique con algún medio probatorio ao responsable ou reponsables destes feitos". "Por este motivo, e para evitar presentar unha denuncia sen datos técnicos que confirmen algún tipo de delito, arriscándonos polo tanto a que se arquive", engade.

Finalmente, o Concello de Pontedeume lembra que foi o "único" en denunciar estes feitos ante as autoridades competentes, tanto na conca do río, coma no parque natural coma no Ministerio.