O PPdeG di que a emenda da lingua "pretende facilitar a imposición aos nacionalistas"

Tellado cualifica de "despropósito" a reforma educativa e "convida" á ministra Celaá a fixarse no "modelo galego".

Por Europa Press / Redacción | SANTIAGO DE COMPOSTELA | 06/11/2020 | Actualizada ás 12:53

Comparte esta noticia

O secretario xeral do PPdeG, Miguel Tellado, dixo que a emenda aprobada polos socios do Goberno central no ámbito da reforma educativa sobre o idioma deixa "claras cales son as intencións reais". "É evidente que o que se pretende é facilitar que en determinadas comunidades onde gobernan os nacionalistas se impoñan modelos educativo que apostan pola inmersión lingüística, que non é máis que a imposición lingüística", manifestou.

Tellado pronunciouse así, no marco dunha rolda de prensa na que cualificou de "despropósito" a reforma educativa coa que, dixo, o Goberno que preside Pedro Sánchez "renuncia ao pacto de estado" pola educación na "enésima" lei "imposta".

"Non podemos permitir que o Goberno nos coe pola porta de atrás unha reforma educativa que é un auténtico despropósito, profundamente partidista e ideolóxica e que restrinxe o dereito a decidir das familias", dixo Tellado, en referencia a este último extremo, en que o Goberno decidiu a posibilidade de retirar concertos educativos aos colexios nos que haxa segregación por sexo nas aulas.

Preguntado por en que parte da emenda aprobada polo relatorio está en desacordo o PP e que propostas de cambio farán, Tellado referiuse a que "o que queda claro son as intencións reais" do Goberno e os seus socios "cando o que se pretende é evitar unha frase como a 'lingua vehicular'".

Concretamente, o aprobado no relatorio da comisión de educación é o seguinte: "As Administracións educativas garantirán o dereito dos alumnos e as alumnas a recibir ensinos en castelán e nas demais linguas cooficiais nos seus respectivos territorios, de conformidade coa Constitución Española, os Estatutos de Autonomía e a normativa aplicable".

A Constitución Española recolle que o castelán é a lingua española oficial do Estado, que todos os españois teñen o deber de coñecela e o dereito a usala, mentres que as "demais linguas españolas" serán tamén "oficiais" nas respectivas comunidades autónomas de acordo cos seus estatutos. Así mesmo, o texto do 1978 inclúe que a "riqueza das distintas modalidades lingüísticas de España é un patrimonio cultural que será obxecto de especial respecto e protección".

Neste escenario, para o PP galego, a emenda aprobada ten como "intención real" "apostar pola inmersión" e "facilitar que determinados partidos nacionalistas no Goberno" poidan levala a cabo. "E nós non estamos de acordo, reivindicamos que o castelán siga sendo lingua vehicular do ensino en todo o país e cremos que abrir novamente este debate só contribúe a dar ás a determinados partidos nacionalistas que buscan converter a lingua nun elemento de conflito e non nunha arma de entendemento", sentenciou.

"IMPOR SEN ACORDO COA COMUNIDADE EDUCATIVA"

En xeral, Tellado censurou que o Executivo de Sánchez e Iglesias "trata de impor sen alcanzar o mínimo acordo coa comunidade educativa, nin coas familias nin cos docentes" a reforma educativa. "Enterra o pacto", reprobou o dirixente popular, quen contrapuxo o "modelo galego" como a seguir polo conxunto do Estado.

"Convidamos á ministra a fixarse no modelo educativo galego, cuns excelentes resultados educativos, moi por encima da media nacional", destacou Tellado, nunha intervención na que enxalzou que o modelo galego "respecta a liberdade das familias e a autonomía dos centros educativos".

"Imos pelexar", dixo, en "contra" desta lei coa que os populares "non están de acordo", sinalou.

O secretario xeral do PPdeG, Miguel Tellado, en rolda de prensa. PARTIDO POPULAR DE GALICIA
O secretario xeral do PPdeG, Miguel Tellado, en rolda de prensa. PARTIDO POPULAR DE GALICIA | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 uu1

Se querem impor o castelhano que digam, mas a lei não está da sua parte! Alguém me poderia dizer o artigo da constituição onde aparece “dereito a decidir das famílias” no tema linguístico? O direito das familiar a decidir aparece no artigo 27 ponto 3. “3. Os poderes públicos garantem o defeito que assiste aos pais para que os seus filhos recebam a FORMAÇÃO RELIGIOSA E MORAL que esteja de acordo coas suas próprias convicções.” E sim, com os dados atuais, o que não cumpre e o artigo 3 ponto 3 “3. A riqueza das distintas modalidades linguísticas de Espanha é um patrimônio cultural que será objeto de especial respeito e proteção.” Ou por acaso as verbas “respeito e proteção” significam “marginação, discriminação, desprezo, etc”, pois hoje em dia é um patrimônio cultural que está a desaparecer. Falemos galego e aproveitemos os recursos disponíveis das variedades do nosso idioma