Enfermeiras Eventuais alerta que serán necesarias 8.000 prazas de enfermaría en Galicia para os vindeiros anos
O colectivo Enfermeiras Eventuais en Loita sinalou que a mellor nota do último proceso selectivo non obtivo praza no Sergas, que presenta "unha das peores proporcións de enfermeira por paciente" do Estado e de Europa.
Por Europa Press / Redacción | SANTIAGO DE COMPOSTELA | 06/11/2020 | Actualizada ás 19:33
O colectivo Enfermeiras Eventuais en Loita calcula que o sistema sanitario galego necesitará unhas 8.000 prazas de enfermaría durante os próximos anos como mínimo, xa que este cálculo é previo á pandemia, unha crise que "puxo de manifesto toda a problemática" que envolve a unha categoría profesional que desempeñan máis de 1 de cada 3 enfermeiras de forma eventual.
Na tarde deste venres Catuxa Lanjarón, representante da plataforma Enfermeiras Eventuais en Loita, compareceu na comisión de reactivación pola covid-19 constituída no Parlamento de Galicia, onde apelou á responsabilidade da Xunta para pór fin a unha situación de "precaridade" e "inestabilidade" que fai que, de media, as enfermeiras tarden "unha media de 12 anos" en conseguir unha praza fixa a pesar de aprobar os distintos exames aos que se presentan.
Como exemplo diso, Catuxa Lanjarón sinalou que a mellor nota do último proceso selectivo non obtivo praza no Sergas, que presenta "unha das peores proporcións de enfermeira por paciente" do Estado e de Europa. De feito, segundo a representante do colectivo, Galicia está tres puntos por baixo da media europea, onde o cociente de enfermeira é de 8 por cada mil habitantes -Galicia ten 5--.
Lanjarón lembrou que máis de 11.000 persoas figuran nas listas de contratación de enfermaría, traballadoras que "encandenan 20 ou 25 días sen libranza", non dispoñen de cuestións contractuais como permisos ou libranzas e viven "pendentes do móbil" porque, se non atenden as chamadas para a cobertura de contratos, padecen a penalización de caer ao fondo da lista.
Todas estas condicións laborais de "precaridade" e que "raian a explotación", a continuidade, deriva en problemas para as traballadoras que forman parte "do maior colectivo da sanidade" e que, aínda que din ser conscientes de que a eventualidade é necesaria para o funcionamento do sistema, denuncian que se converteu na política "estrutural" de contratación no Sergas, onde botan en falta a "profesionalización" dos recursos humanos para unha xestión correcta da xestión de persoal.
"Non pedimos investir máis, pedimos investir mellor", recalcou Lanjarón, que incidiu en que as enfermeiras fixeron fronte, coas devanditas condicións laborais, á primeira onda da pandemia "sen pedir nada cambio, só respecto á profesión e reclamando seguridade no traballo".
liña seguida, fixo mención a unha enquisa interna, realizada pola propia plataforma ante a "falta de transparencia" da que acusa ao Sergas. Así, asegura que o 64% das enfermeiras con máis dunha década de actividade continúan exercendo con contratos de substitución de curta duración.
Segundo a portavoz de Enfermeiras Eventuais, ao longo dos últimos anos repítense as denuncias ante a Inspección Laboral por contratos feitos "en fraude de lei" como o que unha persoa sexa contratada de luns a venres, rompa a relación contractual durante o fin de semana e o luns asínese un novo para o mesmo posto que exercera a semana anterior.
"A situación laboral á que nos someten ás enfermeiras eventuais só prexudica á sanidade pública", subliñou Lanjarón, antes de demandar un plan para a cobertura das 8.000 prazas que serán necesarias nos próximos anos a través de "unha macro OPE" e a conversión en prazas estruturais de "todos os postos" que foron cubertos durante máis de dous anos por eventuais.
CONTAXIOS NOS TRABALLOS
Por último, xa na quenda de peche tras as intervencións dos grupos, Lanjarón finalizou a súa comparencia cunha reflexión sobre os contaxios entre os profesionais sanitarios, que considera que non están a ser ben tratados polos responsables de xestionar os recursos.
"Non todos os brotes se dan no ámbito familiar do persoal. A xente contáxiase traballando, non só na súa casa ou tomando café. Estamos fartas de escoitar estas cousas na prensa. Non se merecen o persoal que teñen", espetou.
GRUPOS PARLAMENTARIOS
Por parte do PPdeG, a encargada de intervir na única comparencia da tarde do venres na comisión de reactivación foi a deputada Encarna Amigo, que defendeu os "avances" dos últimos anos a través de "medidas estruturais" para os persoais, como demostra, segundo a parlamentaria, que Galicia fose "das poucas comunidades" que convocou oposicións durante os "peores anos" da crise "esgotando a taxa de reposición". "Somos conscientes de que poden facer falta enfermeiras, pero non se pode dicir que non se fai nada", apostilou.
A líder nacionalista Ana Pontón falou en nome do BNG para denunciar que "a precaridade e os malos tratos laborais non pode ser a resposta" para un colectivo representado na súa maioría por mulleres, o que lle levou a reflexionar que "seguro que ten moito que ver" o que se trata dunha profesión feminizada coas condicións imperantes.
Por último, o deputado do PSdeG Julio Torrado censurou que a Administración autonómica empregue "demasiada enxeñaría en parecer que está ben" en lugar de "facelo ben de verdade", o que, segundo o parlamentario, "igual era moito máis sinxelo".
