A fin de semana sáldase con 28 identificados por incumprir as medidas en concellos da Coruña
Tramitáronse 17 actas de infracción.
Por E.P. | A CORUÑA | 10/11/2020 | Actualizada ás 11:56
Axentes da Policía Autonómica informaron de que levaron a cabo este fin de semana 28 dispositivos na provincia da Coruña no marco do plan de actuacións específicas destinadas á prevención, inspección e control do cumprimento das medidas adoptadas polas autoridades competentes para combater a covid-19.
Nestes controis, os axentes realizaron 48 inspeccións en nove concellos da provincia no pasado fin de semana, que deron como resultado a identificación de 28 persoas e a tramitación de 17 actas de infracción.
En base a este plan, a Policía Autonómica destinou efectivos entre o 6 e o 8 de novembro para controlar que se están cumprindo as medidas vixentes para frear a expansión do virus; e activáronse dispositivos en nove municipios da provincia: Ames, Boiro, A Coruña, Ferrol, Santiago de Compostela, Noia, A Pobra do Caramiñal, Porto do Son e Teo.
No conxunto da comunidade galega, os axentes actuaron nun total de 30 concellos, nos que que se rexistraron 87 operativos cun total de 116 inspeccións, con máis de 552 persoas identificadas e 29 denuncias tramitadas.
Durante os operativos, os axentes controlaron que nos establecementos abertos ao público, terrazas e espectáculos públicos estaban a cumprirse as medidas aprobadas polas autoridades sanitarias para facer fronte á covid-19, como o uso obrigatorio de máscara, o cumprimento da distancia de seguridade, así como o aforamento e o horario de peche dos locais e a prevención do botellón.
