Por Europa Press / Redacción | MADRID | 11/11/2020 | Actualizada ás 13:46
A ministra de Facenda e portavoz do Goberno, María Jesús Montero, anunciou este mércores no Congreso que o Consello de Ministros aprobará o vindeiro martes un decreto lei para a rebaixa do IVE das máscaras desbotables do 21% ao 4%.
Na súa defensa do proxecto de Orzamentos Xerais do Estado de 2021, que se enfronta a partir deste mércores no Congreso ao seu debate de totalidade, Montero asegurou que o Goberno adoptou esta medida tras confirmar que a Comisión Europea non abrirá un procedemento de infracción por este cambio legal.
Montero asegurou que o Goberno estará "vixiante" para que esta baixada do IVE "se traduza nunha rebaixa do prezo para o consumidor final e non nunha maior marxe empresarial". Ademais, avanzou que o Goberno tramitará unha rebaixa do prezo de venda ao público das máscaras cirúrxicas a partir do próximo xoves na Comisión Interministerial de Prezos de Medicamentos (CIPM).
"PARECE QUE A ALGÚNS NON LLES GUSTOU"
Tras o anuncio, a ministra tivo que interromper a súa intervención polos berros de varios deputados, chegando incluso a presidenta do Congreso, Meritxel Batet, a pedir en polo menos tres ocasiones silencio.
"Parece que a algúns non lles gustou a noticia", ironizou a ministra de Facenda e portavoz do Goberno, que tras recibir os aplausos da bancada do PSOE e de Unidas Podemos, indicou que "nunca chove a gusto de todos".
"Non se poñan nerviosos, acabamos de empezar o debate", pediulles Montero, que identificou ao PP como o grupo dos deputados que protestaron tras o anuncio. "A pesar da mala noticia que parece para algúns, polo ruído da bancada do PP, o vindeiro martes este Goberno levará un decreto lei que rebaixa o IVE das máscaras", dixo.
BRUXELAS DEU O SEU AVAL Á MEDIDA ESTE MARTES
Segundo informou o Ministerio de Facenda tras o anuncio de Montero, a Secretaría de Estado de Facenda remitiu o pasado venres unha carta á Dirección Xeral de Fiscalidade e Unión Aduaneira da Comisión Europea para preguntar se a normativa comunitaria vixente ampara unha redución do IVE ás máscaras vendidas a particulares.
A Comisión Europea respondeu este martes pola tarde sinalando que estes tipos reducidos ou exentos "non están en principio permitidos" pola vixente directiva comunitaria, aínda que si baixo a proposta de reforma na que traballa a Comisión Europea e que retomará a presidencia alemá.
En todo caso, subliña que a Comisión Europea non ten intención de abrir procedemento de infracción contra Estados membros que queiran aplicar tipos reducidos ou exentos en máscaras, aínda que sinala que normalmente non se inicia o camiño cara a unha sanción cando xa se tramita unha reforma nese mesmo sentido.
FEIJÓO CELEBRA A MEDIDA
O presidente da Xunta, Alberto Núñez Feijóo, celebrou o anuncio da rebaixa do IVE das máscaras, que cualificou de "boa noticia" antes de celebrar que o Executivo que dirixe o socialista Pedro Sánchez "rectifique e atenda o clamor cidadán".
"A rebaixa do IVE das máscaras é unha boa noticia. Non facelo era un erro que hoxe mesmo (durante a súa propia comparecencia no Parlamento autonómico) lle volvemos lembrar desde a Xunta. Celebro que rectifique e atenda o clamor cidadán", trasladou, a través do seu perfil na rede social Twitter.
Antes de que se confirmase este anuncio, Feijóo aproveitara a súa comparecencia parlamentaria para cargar contra a "mascarada" que, baixo o seu punto de vista, protagonizou o Goberno central durante os últimos meses ao "mentir" afirmando que non se podía baixar o IVE das máscaras, unha cuestión que agora "desmonta" a Unión Europea.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.