Cribado a máis de 5.500 veciños de Ribeira tras perderlle a pista á cadea de contaxios
Estas probas terán lugar entre este xoves e domingo.
- Os rastrexadores de Feijóo: pasan de ser 6.000 como anunciara a só 700
- O cribado da USC detecta só un 0,82% de positivos entre case 14.000 alumnos
Por Europa Press / Redacción | SANTIAGO DE COMPOSTELA | 11/11/2020 | Actualizada ás 15:40
O Sergas fará un cribado a máis de 5.500 veciños de Ribeira de entre 40 e 50 anos ante o incremento de casos e "a imposibilidade de seguir a cadea epidemiolóxica en moitos deles".
Segundo informa a xerencia da área sanitaria de Santiago, este cribado terá lugar entre este xoves e domingo. Citarase a este grupo poboacional que teña cartón sanitario nos centros de saúde de Ribeira.
Os citados recibirán un SMS coa hora e lugar, que será na lonxa nova no porto de Ribeira. O acceso é peonil e non se recomenda ir en coche. Deste xeito, tomaranse mostras nasofarinxeas para realizar PCR, que serán analizadas a través da técnica de 'pooling'.
O Sergas agradece a colaboración do Concello de Ribeira polo apoio de Policía Local e Protección Civil, así como de Portos de Galicia e a xerencia da lonxa.
