Por X.M. Fernández | Verín | 13/11/2020 | Actualizada ás 20:40
Con metodoloxías pedagóxicas innovadoras, esta acción tratará de reforzar a conciencia da importancia da hixiene persoal na prevención fronte á transmisión de enfermidades infecto-contaxiosas, como a COVID-19. A través da participación en diversos experimentos, o alumnado formaranse no coñecemento do mundo microscópico e no funcionamento do sistema inmunolóxico, e verán en acción ao xabón e a outros desinfectantes de acción viricida. Tamén, servirá para que coñezan as dúas hipóteses máis salientábeis sobre a orixe da COVID-19 ou como se fai un test de anticorpos, a través dun experimento de cromatografía caseira con alcol e rotuladores.
A intención final desta formación é que o alumnado tome conciencia sobre a importancia da hixiene persoal (boca, nariz e mans) na transmisión das doenzas infecto-contaxiosas e ao mesmo tempo integre no seu día a día as medidas de protección establecidas polas autoridades sanitarias e civís.
Fátima Fernández, experta en educación en saúde, licenciada en Farmacia, Enxeñeira Técnica Agrícola, Máster en Saúde Internacional de Cooperación e Máster en Profesorado de ESO e Bacharelato, será a persoa responsable de desenvolver a devandita acción nas aulas que se acollan á iniciativa impulsada polo Concello de Verín.
Para a concelleira de Educación e Cultura, Emilia Somoza, “Paréceme que é unha magnífica oportunidade para que unha parte importante da nosa xente moza adquira ou reforce formación en saúde. Espero que a proposta sexa ben acollida e que sirva para que o alumnado de ensino medio da nosa comarca pase a liderar no seu ámbito familiar ou de amizades a prevención á COVID-19 e a outras doenzas contaxiosas.”
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.