Feijóo argumenta que as sete cidades aínda están "por enriba dos límites adecuados" para poder reabrir

O presidente da Xunta, Alberto Núñez Feijóo, esgrimiu que as sete cidades galegas aínda están "por enriba dos límites" que o Executivo galego considera "adecuados" para poder retirar os peches perimetrais e reabrir a hostalaría.

Na mesma xornada na que se reuniu o subcomité clínico e deu novos pasos, Feijóo recoñeceu a súa preocupación pola evolución na área viguesa.

Precisou que lle preocupa, sobre todo, "desde o punto de vista da expansión do virus" e non tanto pola presión asistencial. Non en balde, esgrimiu que "a capacidade de resistencia sanitaria" da cidade "é inmensa".

"Certo é que Vigo e Pontevedra son, neste momento, as cidades nas que se producen un maior número de infeccións novas; logo Ferrol e Lugo, despois Santiago, e onde menos se incrementan as infeccións é en Ourense e A Coruña. Pero nas sete cidades estase por enriba dos límites que consideramos adecuados para poder reabrir a hostalaría e a mobilidade sen as súas limitacións nos seus ámbitos municipais", resolveu.