O Parlamento pide ao Goberno aclarar os prazos de varios proxectos na cidade da Coruña
As actuacións sobre as que demanda explicacións son a construción da estación intermodal, a ampliación da ponte de Pasaxe, a instalación da pasarela en Pedralonga e a Cuarta Rolda.
Por E.P. | SANTIAGO DE COMPOSTELA | 13/11/2020 | Actualizada ás 18:49
A Cámara galega demandou ao Goberno central que aclare os prazos de execución e investimentos previstos para unha decena de proxectos pendentes de levar a cabo na cidade da Coruña e que considera "de carácter prioritario".
A proposición non de lei foi aprobada na Comisión 2ª, Ordenación Territorial, Obras Públicas, Medio Ambiente e Servizos cos votos a favor do PPdeG, grupo proponiente, e a abstención da oposición, BNG e PSdeG.
En concreto, o Parlamento solicita á Xunta que se dirixa ao Executivo central para que concrete os prazos e os investimentos previstos para varias infraestruturas da cidade herculina.
As actuacións sobre as que demanda explicacións son a construción da estación intermodal, a ampliación da ponte de Pasaxe, a instalación da pasarela en Pedralonga e a Cuarta Rolda.
Así mesmo, tamén pide información sobre as melloras nas conexións ferroviarias entre A Coruña e Ferrol e Lugo ou a instalación de dous novos 'fingers' no aeroporto de Alvedro, así como a ampliación da avenida Alfonso Molina, o dragado da ría do Burgo e o Viario 18.
O encargado de defender a iniciativa foi o deputado popular Martín Fernández Prado, que tachou de "lamentables" os Orzamentos Xerais do Estado (PGE) que, di, castigan "por partida dobre" a cidade herculina "porque desparecen obras que estaban orzadas desde 2018".
