Por Galicia Confidencial | Santiago de Compostela | 16/11/2020 | Actualizada ás 21:00
O pasado luns 9 de novembro, o Boletín Oficial da Provincia de Ourense recollía o nomeamento dun traballador eventual no posto de auxiliar político no Concello de Ourense. Para este posto, adscrito ao gabinete de prensa da institución municipal, era nomeada unha persoa sen titulación ningunha en comunicación ou xornalismo, nin tampouco colexiación que poida acreditar a súa adecuación ás características deste traballo.
A Xunta de Goberno do Colexio Profesional de Xornalistas rexeita este nomeamento. O seu decano, Francisco X. González Sarria, trasladou por carta ao alcalde de Ourense, Gonzalo Pérez Jácome, o seu malestar por estes feitos. O CPXG defende que os postos de traballo de comunicación deben ser desempeñados sempre por xornalistas, unha circunstancia que non se está a cumprir con este nomeamento.
Así mesmo, e en cumprimento do mandato de defender a profesión e garantir a independencia e liberdade informativa, o Colexio de Xornalistas suxírelle ao Concello de Ourense que as necesidades en materia de comunicación que teña a institución sexan incorporadas á Relación de Postos de Traballo e debidamente dotadas orzamentariamente, con categorías relacionadas coa comunicación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.