Ciudadanos pide que o Concello de Santiago rastrexe a covid en augas residuais das residencias
"As autoridades sanitarias locais contan con recursos para o diagnóstico precoz de casos asintomáticos entre os veciños da nosa cidade", asegura a dirixente da formación laranxa en Santiago, María Vilas.
Por E.P. | SANTIAGO DE COMPOSTELA | 16/11/2020 | Actualizada ás 19:04
A coordinadora de Ciudadanos en Santiago de Compostela, María Vilas, pediu ao Concello da capital galega que poña en marcha un sistema de rastrexo da covid nas augas residuais das residencias e as zonas de risco.
Nun comunicado remitido aos medios, a coordinadora de Cs asegura que o control epidemiolóxico da pandemia ten moitos aspectos esenciais que poden levar a cabo por medio das administracións públicas locais.
"Á parte da concienciación social e do correcto comportamento da poboación para manter as medidas de distanciamento e de hixiene, as autoridades sanitarias locais contan con recursos para o diagnóstico precoz de casos asintomáticos entre os veciños da nosa cidade", asegura a dirixente da formación laranxa.
Así, Vilas destacou que, nun recente estudo publicado na revista Nature Biotechnology, se demostra que a análise das augas residuais das residencias da terceira idade poden proporcionar unha alerta precoz e dinámica de casos asintomáticos ou portadores de infección por Sars-Cov-2.
"Algo tan sinxelo como monitorar os restos de virus nas augas residuais das residencias de anciáns da nosa cidade pode darnos unha vantaxe de ata 8 días á hora de detectar casos de portadores asintomáticos e desta maneira evitar a propagación do mesmo entre os traballadores e usuarios", manifesta.
Así mesmo, sinala que, mediante a análise das mesmas augas, pódense detectar casos de enfermos portadores do virus mesmo antes de que as probas serológicas sexan positivas. "Unha simple proba analítica en cada unha das residencias de maiores da nosa cidade podería detectar rapidamente que o virus se coou entre os usuarios e, desta maneira, tomar as medidas adecuadas para realizar PCR aos traballadores e residentes e poder illar de inmediato os casos infectados", afirma.
Cidadáns tamén expón que esta medida se poida levar a cabo en colectores seleccionados da cidade para, desta maneira, observar que áreas de Santiago están máis afectadas polo virus e poder realizar test diagnósticos precoces sobre a súa poboación.
"A aplicación destas sinxelas medidas de detección do virus en augas residuais, tanto nas residencias de maiores como nos colectores elixidos estratexicamente da nosa cidade, podería facer de Santiago unha cidade pioneira e referente na prevención precoz de brotes de infectados e en evitar a propagación do virus entre os nosos veciños", destaca.
