Políticas sustentables e educación de calidade: os nenos galegos poñen deberes á clase política

Nove nenos e adolescentes galegos, en representación dos seus consellos locais, participaron este martes no VIII Foro de Participación Infantil e Adolescente de Galicia, onde expuxeron á clase política as súas demandas sobre a atención á infancia, así como propostas que melloren a súa calidade de vida. O pleno, coorganizado polo Parlamento galego e Unicef-Comité de Galicia e enmarcado no 'Pacto Galego pola Infancia', conduciuno o presidente da Cámara, Miguel Ángel Santalices.

Ademais dos vogais dos oito consellos locais participantes -procedentes de Teo, Redondela, Ponteareas, Tomiño, Cabanas, O Porriño, Moeche e Castrelo de Miño-, representantes do PSOE, BNG e PP, así como a presidenta de Unicef Galicia, Miriam Garabito; e a conselleira de Política Social, Fabiola García Martínez, atenderon ao foro.

Aínda que a pandemia de covid-19 e as restricións de aforamento impediron que os nenos e adolescentes participantes acudisen, como facían noutras edicións, ao propio Parlamento a trasladar as súas inquietudes, as intervencións viñeron igualmente cargadas de mensaxes e 'deberes' para os políticos galegos.

As súas propostas baséanse no 'Manifesto 2020 da infancia e a adolescencia', un documento que recolle as conclusións do V Encontro estatal de consellos de participación infantil do pasado outubro, e nos 17 obxectivos de Desenvolvemento Sustentable (ODS) da Axenda2030 creada pola ONU.

A crise social e sanitaria provocada pola covid-19 foi un dos temas centrais do foro. Juan Vázquez, do consello de Ponteareas, referiuse ao dano que o exceso de luvas e máscaras está a producir nos ríos galegos, uns caudais xa de seu "moi contaminados". "Non podemos esperar a que a situación se arranxe soa", destacou e, para iso, desde Ponteareas propoñen unha maior vixilancia das zonas máis afectadas e limitacións para as embarcacións que limpan os seus depósitos no mar, entre outras medidas.

A covid-19 non só afectou a saúde dos máis pequenos, tamén tivo un gran impacto na súa etapa formativa. Xoel Viomar, de Tomiño, criticou o desenvolvemento das clases virtuais durante o pasado curso. "As clases en liña non estiveron á altura. Tivémonos que enfrontar a unha gran carga lectiva nunha situación moi estresante para nós", destacou.

O representante do consello de Tomiño tamén defendeu unha "educación de calidade" que fomente o pensamento crítico e que loite contra a discriminación de mulleres e nenas. Xoel pediu que se revisen os temarios para acabar cos estereotipos e que se inclúa a mulleres representativas nos mesmos.

Outra das inquietudes que marcou o foro foi o respecto ao medio ambiente. Neste sentido, Celia Leirachá, de Cabanas, defendeu que a sustentabilidade debe caracterizar todas as decisións tomadas por un goberno. "Trátase de satisfacer as necesidades presentes sen pór en perigo as futuras", defendeu.

O acceso a enerxías renovables e gratuítas para todos foi unha das peticións principais do grupo de Cabanas, para o que suxeriu a instalación de máis cargadores e placas solares, así como o fomento das enerxías renovables mediante a súa utilización en edificios públicos. Celia quixo defender tamén a necesidade dun emprego digno, que sexa igualitario, xusto e sustentable.

Alejandro Gómez, do Porriño, avogou por un consumo responsable baseado na reciclaxe e no comercio local. Neste sentido falaron tamén Celtia Vázquez e Carlos Bouzo, de Moeche, que se preguntaban: "Este é o futuro que queremos?". Ademais da reciclaxe, estes dous mozos lembraron a importancia de loitar contra a deforestación e de reducir o consumo de plástico.

Os mozos participantes coincidiron en subliñar o compromiso que teñen co futuro e que esperan que adquiran as forzas políticas. "Queremos que nos escoiten porque temos moito que dicir; queremos cambiar as cousas", declarou Irene Cea, do consello de Teo.

Outro punto en común, reiterado por varios representantes dos consellos locais, foi a prometida creación do Consello Autonómico de Participación Infantil e Adolescente, proxectada o ano pasado para 2020. Adriana Rodíguez, de Castrelo de Miño, demandouno así: "Onde está o Consello que nos prometeron?, teñen pensado crealo?, cando?".

A este respecto, a conselleira de Política Social, Fabiola García Martínez, comunicoulles a creación dun borrador do decreto que dará forma ao Consello "nos próximos meses". A titular de Política Social agradeceu e felicitou aos participantes, como tamén o fixeron os representantes de PP, PSOE e BNG, pola súa implicación e responsabilidade.

Felicitación á que se sumaron a presidenta de Unicef-Comité de Galicia, Miriam Garabito, que ademais esixiu que os nenos ocupen un lugar central na implantación de medidas de recuperación "post-covid"; e o presidente do Parlamento e condutor do foro, Miguel Ángel Santalices, que clausurou así o pleno: "Despois da pandemia, seremos unha sociedade diferente pero, grazas ao voso compromiso, seguro que unha sociedade mellor".