Duras críticas dos colectivos de discapacidade á Xunta por deseñar medidas anti Covid sen pensar neles

O Comité Español de Representantes de Persoas con Discapacidade (Cermi), que engloba a diversos colectivos e entidades do chamado 'terceiro sector', deu este martes un "tirón de orellas" á Consellería de Sanidade, coa que dixo que "case non hai diálogo", porque as restricións adoptadas para loitar contra a COVID-19 "non serven para todos".

Durante a comisión parlamentaria para a reactivación poscoronavirus, o presidente do Cermi en Galicia, Iker Sertucha, agradeceu a atención recibida por departamentos da Xunta como Educación e Política Social, pero lamentou que non sexa así por parte de Sanidade: "Non somos convidados, non somos consultados, non queren a nosa opinión como Cermi galego. Toman decisións case unilaterais".

"Hai decisións acertadas, outras non, e o importante é o debate e se hai un erro, emendalo. Pero se non hai un diálogo e imponse as medidas, é moi complicado", engadiu posteriormente. Por todo iso, tras asegurar que a súa intención é a de "achegar", Sertucha reclamou á carteira que está en mans de Xullo García Comesaña que "se implique máis".

Entre as suxestións que fixo, explicou que hai persoas con discapacidade que "non poden entrar sós" nos centros de saúde e hospitais, ademais de que a atención telefónica en materia sanitaria e de valoración da dependencia supón "unha enorme barreira".

Neste contexto, pediu a Sanidade maior "implicación" e que axude ás entidades de atención á discapacidade a avaliar a calidade e a homologación do material sanitario que adquiren, por exemplo as máscaras transparentes para persoas xordas.

E é que, a pesar do diálogo "extraordinario" que mantén o Cermi coa Consellería de Política Social --á que chegou a premiar polo seu labor-- e con Educación, Sertucha puxo o foco en que se require o "traballo conxunto de todas as consellerías", porque ademais permitiría "liberar carga" ao departamento que dirixe Fabiola García. "Os políticos pensan que a discapacidade é un caixón que pertence á política social, pero temos necesidades en todos os campos", resumiu.

O presidente de Cermi Galicia, Iker Sertucha, durante a comisión parlamentaria para a reactivación de Galicia.. PARLAMENTO | Fonte: Europa Press