A Xunta critica que se protexa máis ao lobo porque "rompe o equilibrio" e se prohíbe a súa caza
Tenta convencer aos gandeiros do prexudicial dunha medida que intenta aprobar o goberno central que recolle limitacións a súa caza.
Por Europa Press / Redacción | SANTIAGO DE COMPOSTELA | 17/11/2020 | Actualizada ás 21:33
A conselleira de Medio Ambiente, Ángeles Vázquez, advertiu este martes que unha maior protección do lobo, como defende o Goberno central, "implica romper o actual equilibrio entre a conservación desta especie e o mantemento das razas autóctonas en extensivo".
Ángeles Vázquez trasladou esta reflexión aos membros e representantes das asociacións e entidades de Razas Autóctonas de Galicia, para informalos do prexudicial desta medida e da postura que defende a Xunta ante a proposta que abandera o Ministerio para a Transición Ecolóxica e o Reto Demográfico, que se resume en incluír o lobo na Listaxe de especies silvestres en réxime de protección especial (Lespe).
A conselleira de Medio Ambiente lembrou que desde hai unha década Galicia conta cun Plan de xestión do lobo, co que "se garante a viabilidade da especie, é dicir, mantense a poboación estable á vez que se compatibiliza -a súa existencia- coa gandaría extensiva e coa viabilidade económica das explotacións".
Esgrimiu que esta non é "unha postura illada e individual de Galicia", senón que é "acorde e común" ao catro rexións ao norte do Río Douro; xa que os intereses de Asturias, Cantabria e Castela e León -xunto cos de Galicia- "veranse directamente afectados de saír adiante esta proposta", pois nestas rexións rexístranse importantes poboacións desta especie asentadas no territorio e, por tanto, son as que sofren as maiores consecuencias sobre o sector gandeiro dos ataques puntuais destes animais.
Non en balde, subliñou que, no caso de que prospere a iniciativa do Ministerio, isto implicaría de entrada a prohibición xenérica da súa caza, ao non considerala unha especie susceptible de aproveitamento cinexético en determinados supostos; dito doutro xeito, "só poderíase autorizar excepcionalmente a captura dalgún exemplar baixo criterios moito máis estritos que na actualidade".
