A Xunta inxecta máis de 7,2 millóns en axudas directas a centros privados e concertados

Xustifica esta partida nas necesidades de contratación e adaptación dos centros ás medidas sanitarias. A orde inclúe aos centros que separan o alumnado por sexo.

Por Europa Press / Redacción | SANTIAGO DE COMPOSTELA | 18/11/2020 | Actualizada ás 15:55

Comparte esta noticia

A Consellería de Cultura, Educación e Universidade concedeu unha nova inxección de fondos públicos aos centros de titularidade privada e concertada de Galicia. Esta partida, dotada con máis de 7,2 millóns de euros, repartirase mediante axudas directas coa xustificación de atender a urxencia da dotación de profesorado e adaptar os espazos ao contexto da COVID-19 e ás medidas sanitarias.

A resolución, publicada no Diario Oficial de Galicia, establece unha contía total de 7.250.011 euros. Deles, 3.090.447 destinaríanse á adecuación de espazos e adquisición de materiais hixiénico-sanitarios, entre outros, mentres que 4.159.564 serían para a contratación de docentes (1.455.844 para a anualidade de 2020 e 2.703.720 en 2021).

A Consellería xustifica a urxencia e a concesión directa debido ás necesidades para adaptarse ao contexto de pandemia e aos requisitos establecidos polas autoridades sanitarias.

Estas medidas implican, por unha banda, a necesidade de contratar profesores para impartir as horas adicionais derivadas do desdobre extraordinario de grupo, ademais da adecuación dos espazos para garantir a distancia interpersoal, coa instalación de biombos, separacións, adquisición de máscaras ou hidroxeles e outro tipo de cuestións indicadas polas autoridades educativas e sanitarias.

Todo iso, indica a Xunta, fai "imprescindible" recorrer á tramitación destas axudas mediante concesión directa, ademais de ao pago anticipado aos beneficiarios da totalidade do importe, co fin de dar unha resposta adecuada ás dificultades actuais e garantir o funcionamento dos centros.

AS AXUDAS MÁIS ELEVADAS

Educación entende, a respecto, que as subvencións están xustificadas pola excepcionalidade da situación e "por razóns de interese público, social, económico e humanitario".

Entre as maiores dotacións atópanse o centro privado Fogar de Santa Margarida da Coruña, que recibirá 403.097 euros, ou o Liceo A PAZ e a Compañía de María, ambos da mesma cidade e que se beneficiarán de importes por 219.263 e 187.357 euros, respectivamente.

Na capital galega, o La Salle recibirá 211.204 euros e a Compañía de María 189.955 euros. O Santo Ángel de Ourense, pola súa banda, beneficiarase dunha axuda de 203.985 euros, e o CPR Plurilingüe Sacro Corazón de Jesús de Pontevedra de 181.103 euros.

CENTROS QUE SEGREGAN

A orde da Xunta inclúe, ademais, aos centros que separan ao alumnado en función do seu xénero, con axudas para compensar as tarefas de adaptación e a adquisición de materiais. En concreto, o centro Peñarredonda da Coruña contará con 9.390 euros, o Monteespiño en Culleredo con 13.308 euros, as Acacias-Montecastelo con 38.015, e o Aloya 10.277 euros, estes dous últimos no municipio de Vigo.

Alumnos dun centro privado de Madrid. Eduardo Parra - Europa Press - Arquivo
Alumnos dun centro privado de Madrid. Eduardo Parra - Europa Press - Arquivo | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta