Fernando Simón afirma que o impacto que están a sufrir as residencias "é menor" que na primeira onda

O director do Centro de Coordinación de Alertas e Emerxencias Sanitarias, Fernando Simón, afirmou que "o impacto proporcional" que están a sufrir actualmente as residencias pola pandemia "é menor" que na primeira onda.

"Son un número importante pero o impacto proporcional é menor que na primeira onda", afirmou, para precisar que "na primeira onda houbo un impacto enorme pero proporcionalmente o número de residencias afectadas non foi un número excesivo".

En calquera caso, indicou que actualmente as residencias están "moi ben preparadas", xa que "melloraron moito as súas condicións" e "fixeron un gran esforzo", en alusión ao incremento de recursos tanto nestes centros como en hospitais, que "están menos sobrecargados".

Por outro lado, adiantou este xoves que a semana que vén estará xa dispoñible o primeiro borrador sobre a estratexia de vacinación do Covid-19.

Simón suxeriu que este borrador podería ser discutido no plenario do Consello Interterritorial do Sistema Nacional de Saúde (CISNS), aínda que lembrou que deberá ser discutido por diferentes grupos antes de ter un documento final.

"Segundo o que me comentaron é un documento aparentemente moi completo e que vai permitir ter unha estratexia de vacinación moi correcta, aínda que hai que conseguir que todos os actores involucrados se empoderen do mesmo", aseverou.