O PSOE de Ourense insta a Caride a renunciar como deputado provincial para non sustentar a Baltar
Os socialistas lamentan que Caride "non facilitou un goberno progresista para a provincia" polo que lle esixen que "polo menos traballe desde dentro e deixe de facer perdurar a Baltar".
Por E.P. | SANTIAGO DE COMPOSTELA | 20/11/2020 | Actualizada ás 18:09
O grupo do PSOE na Deputación de Ourense instou este venres a Miguel Caride, quen cesou como vicepresidente provincial, a renunciar como deputado. Denunciaron tamén que a realización de plenos e reunións por videoconferencia, "decidido por Manuel Baltar", ten como único fin "tapar a realidade, que non é outra que ocultar que un tránsfuga sostén o goberno provincial".
O deputado socialista, Ignacio Gómez, expuxo que lle piden a Caride "que deixe o seu posto como deputado, xa que ao ser tránsfuga non pode ser un palmeiro que sustente o goberno de Baltar". Na mesma liña, lamentou que "non facilitou un goberno progresista para a provincia" polo que lle esixen que "polo menos traballe desde dentro e deixe de facer perdurar a Baltar".
Os socialistas remarcaron que o informe do secretario da Deputación ---que levou ao cesamento de Caride como vicepresidente--- fora solicitado pola formación a finais de outubro e non lles foi facilitado por "cuestións formais discutibles".
Así pois, acusaron ao presidente provincial de "querer colgar medallas" cun cesamento que "foi levado á práctica polo secretario e non por el". Ademais, criticaron que "se lle reserve a praza, como así o expresou, co único fin de que a lei lle dea outra volta á situación".
O secretario provincial e portavoz municipal, Rafael Villarino, sentenciou que "Caride pode pasar á historia como a persoa que fixo posible cambiar o destino de Ourense ou como un palmeiro". Así mesmo, reiterou que, polo momento, "a Deputación está sustentada nun tránsfuga" e que "non confían en que Baltar prescinda del por razóns obvias".
Neste sentido, Villarino acusou a Baltar de "manter o goberno provincial a calquera prezo como xa se viu co goberno local". Así, comparou "o secuestro da función política da Deputación" coa situación de crise municipal onde, para os socialistas, "o PP colocou a Jácome na alcaldía para abandonalo e posteriormente bloquear un cambio de goberno".
"SILENCIAR Á OPOSICIÓN"
O PSOE tamén mostrou o seu rexeitamento á celebración de plenos de forma telemática e acusou a Baltar de "secuestrar a Deputación" para "impedir" o traballo da oposición.
Os dirixentes socialistas que interviñeron expuxeron que houbo plenos presenciais con "1.394 contaxiados por covid na provincia e 17 ingresados diarios" e que, agora, "que a incidencia é a máis baixa da península" optar pola videoconferencia "non é máis que unha estratexia do PP para silenciar á oposición".
Denunciaron que, aquelas comisións celebradas deste xeito, "estiveron cheas de incidencias, perdas de sinal, parálise de imaxes, ausencias de son" polo que "é inviable".
Así, Villarino lamentou que se trata "dunha estratexia moi básica e rudimentaria" que demostra "a debilidade do goberno". Un goberno que "non vai acabar o mandato, non porque non o desexen, senón porque a lei se encargará de que así sexa", sentenciou.
