Por Europa Press / Redacción | SANTIAGO DE COMPOSTELA | 21/11/2020 | Actualizada ás 20:05
Galicia contabiliza 54 municipios nos que non se rexistrou ningún caso de covid-19 nos últimos 14 días, o que implica que o 17,2% dos 313 concellos galegos está libre de coronavirus. De todos estes, a gran maioría (33) correspóndense coa provincia de Ourense.
Este número supón que máis dun terzo (o 35,9%) dos concellos ourensáns non detectaron ningún positivo nas últimas dúas semanas. En concreto, trátase da Arnoia, Beade, A Bola, O Bolo, Carballeda de Valdeorrras, Castro Caldelas, Cenlle, Cortegada, Chandrexa de Queixa, Esgos, Gomesende, Xunqueira de Ambía, Xunqueira de Espadañedo, Larouco, Maceda, Manzaneda, A Mezquita, Montederramo, Oímbra, Padrenda, Parada de Sil, Pontedeva, Quintela de Leirado, San Xoán de Río, Riós, Rubiá, San Amaro, Sarreaus, Taboadela, Vilardevós, Vilariño de Conso, Vilar de Santos e Vilar de Barrio.
Tras Ourense, sitúase Lugo con 13 municipios libres de covid --case un 20% dos 67 que conforman a provincia--: Baleira, Folgoso do Courel, Muras, Navia de Suarna, Negueira de Muñiz, As Nogais, Ourol, O Páramo, Portomarín, Ribeira de Piquín, Riotorto, Sober e O Vicedo.
Á súa vez, só cinco dos 93 concellos da Coruña non detectaron casos de coronavirus nos últimos 14 días: Boimorto, Cerdido, Corcubión, Mañón e Toques; mentres que en Pontevedra tan só hai tres: Catoira, Covelo e Dozón.
Todo iso despréndese do mapa que incorporou este sábado a páxina web da Consellería de Sanidade para informar diariamente os datos da pandemia na Comunidade. Isto implica abandonar o sistema 'semáforo' con tres niveles de alerta --amarelo, laranxa e vermello-- establecido ata o momento, para ofrecer, aínda que nunha infografía monocolor, os positivos detectados en cada concello en 14 días.
INCIDENCIA POR CADA 100.000 HABITANTES NAS CIDADES
Estas cifras tamén permiten calcular a incidencia por cada 100.000 habitantes a 14 días en cada un dos municipios de Galicia, se se relaciona o número total de casos detectados en cada un co seu tamaño. Así, se se observan os datos por cidades, Vigo sitúase á cabeza cun total de 1.079 casos de covid-19 nas últimas dúas semanas, o que deixa unha incidencia de 365,31 positivos por cada 100.000 habitantes, unha taxa na que tamén se coloca de primeira.
Con cifras similares de incidencia está Lugo, posto que a pesar de rexistrar 331 positivos en 14 días, a incidencia é de 336,8 por cada 100.000 habitantes. En paralelo está Pontevedra, con 332,4 casos por cada 100.000 habitantes.
En canto ao termo municipal de Ferrol, o coronavirus ten unha afección de 266,4 por 100.000; por encima da taxa de 210,4 que rexistra A Coruña.
As últimas dúas cidades no que se refire á incidencia da pandemia son Santiago e Ourense, precisamente as dúas que hai semanas presentaban as evolucións máis negativas e nas que, por tanto, antes se tomaron restricións. Na cidade das Burgas, os contaxios detectados nos últimos 14 días supoñen 199,5 por cada 100.000 habitantes, mentres que a menor incidencia a anota a capital galega, con 164,5 positivos por cada 100.000 persoas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.