A Deputación de Ourense acollerá o arquivo persoal e a biblioteca do escritor Xosé Fernández Ferreiro

A Deputación de Ourense acollerá o arquivo persoal e a biblioteca, con máis de 6.000 volumes, do escritor e xornalista Xosé Fernández Ferreiro, natural de Espartedo (Nogueira de Ramuín), académico da Real Academia Galega falecido en 2015. A documentación formará parte dos fondos da Deputación de Ourense, arquivados na Biblioteca provincial.

Así o acordaron o presidente provincial, Manuel Baltar, e o escritor Francisco Xosé Fernández Naval, testamentario do autor de 'A morte dun afiador' ou 'Agosto do 36'. O acordo inclúe a reivindicación do seu legado e da súa traxectoria profesional e persoal, con diferentes iniciativas nas que xa se está traballando, como unha ruta literaria en Nogueira de Ramuín.

Durante o encontro, Manuel Baltar destacou "o compromiso con Galicia de Fernández Ferreiro", a súa "ampla obra" en galego e o seu "destacado" traballo como narrador. "Sen dúbida, un dos escritores galegos que máis e mellor traballaron este xénero literario", afirmou.