Por E.P. | SANTIAGO DE COMPOSTELA | 25/11/2020 | Actualizada ás 15:19
O Parlamento de Galicia modificou o seu regulamento para a concesión de axudas co fin de dar o 100 por cen de apoio ás iniciativas vinculadas co coronavirus, como será un convenio en beneficio de comedores e bancos de alimentos que se asinará en próximos días. De feito, nunha explicación remitida a Europa Press, o Parlamento indica que esta modificación se enmarca nas medidas adoptadas pola Cámara "para contribuír a paliar a situación derivada da covid-19".
Non en balde, esta reforma, acordada por unanimidade da Cámara, xorde da posibilidade de asinar un convenio de colaboración entre o Parlamento e a Consellería de Medio Rural, relacionado co apoio a comedores sociais e bancos de alimentos. As mesmas fontes parlamentarias explicaron que este convenio se asinará en próximos días nun acto público.
Concretamente, o Parlamento de Galicia modificou o regulamento polo que se rexe para outorgar subvencións a entidades, de maneira que, de forma excepcional pola cuestión da crise sanitaria, asumirá o 100 por cen do gasto subvencionables das axudas que conceda, fronte ao 80 por cento actual.
A través dunha disposición adicional, como se pode consultar no Boletín Oficial do Parlamento deste martes e en Diario Oficial de Galicia (DOG) deste mércores, a Cámara autonómica modificou o regulamento de organización e funcionamento da Administración do Parlamento no seu artigo 30.3, para que as subvencións públicas que poida conceder de cara a afrontar a situación de emerxencia social derivada da covid-19 poidan alcanzar o 100 por cen dos gastos subvencionables, "sempre que exista dotación orzamentaria".
CRISE SEN PRECEDENTES
A institución autonómica lembra a situación de emerxencia de saúde pública xerada pola expansión do coronavirus SARS-CoV-2, que está a xerar "unha crise sen precedentes que afecta todos os sectores e individuos, ademais de no ámbito sanitario, no ámbito económico e social".
Neste escenario, sinala a exposición de motivos, as distintas administracións, organismos e institucións nacionais e internacionais "tiveron que adoptar medidas drásticas e urxentes para a prevención e loita contra a pandemia" e outras "complementarias para afrontar as necesidades das persoas en situación de risco social e de vulnerabilidade, incrementada por esta situación".
O Parlamento de Galicia xa ao comezo da pandemia transferiu unha partida de 2 millóns de euros procedentes de remanente de tesouraría para contribuír ás necesidades derivadas da crise sanitaria, provocada polo coronavirus. Ademais, o anteproxecto de orzamentos para 2021 contempla a conxelación salarial dos deputados.
SUBVENCIÓNS 2019
Tal e como se pode consultar na páxina web de Transparencia do Parlamento de Galicia, en 2019 concedéronse axudas a cinco entidades de carácter social, á Universidade de Santiago de Compostela e ao Museo do Pobo Galego, que sumaron 38.094,02 euros.
Concretamente, recibiron axudas por 2.400 euros as seguintes entidades: Asociación por Eles Tea Ourense, Asociación Diabética Auria, Comité Cidadán Antisida de Ourense e Asociación de Familias con Discapacidade Intelectual de Valdeorras. Ademais, a entidade Solidariedade Galega co Pobo Saharauí percibiu 11.920 euros, a Universidade de Santiago de Compostela 4.500 euros --dos que xustificou 2.588,31-- e o Museo do Pobo Galego, mediante un convenio subscrito, 12,474 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.