A alcaldesa da Coruña chama a cumprir as medidas sanitarias
O Concello da Coruña aprobou un aumento do orzamento destinado á convocatoria das bolsas comedor do curso 20/21 por un importe de 550.000 euros, "xa que o crédito asignado resulta insuficiente para responder o incremento de concesións", sinala o goberno local.
Por E.P. | A Coruña | 26/11/2020 | Actualizada ás 17:41
A alcaldesa da Coruña, Inés Rey, apelou a cumprir as medidas impostas polas autoridades sanitarias, ao ser preguntada se ve posible flexibilizar as restricións ante a próxima reunión do comité clínico.
Tras asistir á entrega dos Premios Meninas, recalcou que o obxectivo debe ser "frear os contaxios". "Coas cifras de falecidos diarios que temos hai que estar a pensar en protexernos".
"E cumprir as medidas das autoridades sanitarias, non avanzar de maneira insegura porque os contaxios seguen aí e a incidencia acumulada é elevadísima".
Ademais, a rexedora insistiu en que o concello herculino está "ao que digan" as autorides sanitarias a este respecto, ante a pregunta dunha posible relaxación das restricións na cidade.
BOLSAS COMEDOR
O Concello da Coruña aprobou, en Xunta de Goberno, un aumento do orzamento destinado á convocatoria das bolsas comedor do curso 20/21 por un importe de 550.000 euros, "xa que o crédito asignado resulta insuficiente para responder o incremento de concesións", sinala o goberno local.
O curso pasado concedéronse 1.404 bolsas fronte ás 2.237 deste ano. Do novo crédito, 100.000 euros serán con cargo ao orzamento de 2020 (meses de setembro-novembro) e 450.000 con cargo ao orzamento de 2021 (meses de decembro-xuño).
Tamén se autorizou conceder oito suplementos de crédito por un importe de 232.720,11 euros para o pago de varios convenios de 2019 que non foron abonados no exercicio anterior. O financiamento irá a cargo do remanente líquido de tesouraría, de novos ingresos ou mediante anulacións ou de baixas de créditos de gasto ou anulacións doutras partidas.
Ademais na sesión deste venres, tamén se deu luz verde a un cambio nas bases da convocatoria das axudas do plan de reactivación económica e social "para o mantemento e impulso da actividade económica na cidade".
Tamén se aprobou unha modificación do anexo de subvencións nominativas do orzamento 2020 pola que se destinan 12.000 euros á Asociación de empresarios de Agrela.
CRITICAS DE MAREA ATLÁNTICA
Pola súa banda, sobre a Xunta de Goberno, Marea Atlántica denunciou que a alcaldesa levou a esta reunión "unha serie de cambios para corrixir erros graves nas axudas a pemes e persoas autónomas fronte á pandemia".
"Pero négase a ter en conta a proposta do noso grupo para axilizar a súa tramitación e compensar aos beneficiarios e ás beneficiarias polo atraso", engade.
