Doce mortes máis elevan a 1.205 as vítimas mortais da pandemia en Galicia
Tres delas procedían de residencias de maiores.
Por Galicia Confidencial | LUGO | 29/11/2020 | Actualizada ás 21:21
Galicia alcanzou este domingo os 1.205 falecementos desde o inicio da pandemia por covid-19, despois de que nesta xornada a Consellería de Sanidade notificase doce mortes máis por mor desta enfermidade. Todas estas persoas tiñan patoloxías previas, segundo sinala o Sergas.
Son un home de 77 anos no Complexo Hospitalario Universitario de Ourense ( CHUO) e unha muller de 91 no Hospital Lucus Augusti (HULA) que procedía da residencia de maiores de Vilalba.
No Complexo Hospitalario Universitario da Coruña (CHUAC) morreron unha muller de 92 anos e un home de 70.
No Complexo Hospitalario Universitario de Ferrol (CHUF) morreron unha muller de 98 anos que procedía da residencia Nosa Señora das Virtudes, de Pontedeume (A Coruña), e outra muller de 92 anos.
No Complexo Hospitalario Universitario de Pontevedra (CHOP) morreron un home de 89 anos que procedía da residencia de Vilaboa e outro de 84 anos.
No Complexo Hospitalario Universitario de Vigo ( CHUVI) morreron tres homes de 77, 80 e 82 anos e unha muller de 93.
