Un traballador chamado a comparecer no xuízo contra Pachi Vázquez: "Case non sabía ler e asinaba e xa"
Coincidiron nestas afirmacións obreiros, pintores, membros do servizo de axuda a domicilio ou integrantes da brigada de limpeza,
Por Europa Press / Redacción | SANTIAGO DE COMPOSTELA | 02/12/2020 | Actualizada ás 13:48
Na sexta xornada do xuízo por prevaricación contra o exlider do PSdeG Pachi Vázquez durante a súa etapa como alcalde do Carballiño, un dos dez traballadores chamados a comparecer asegurou que cando entrou a traballar para o Consistorio "case non sabía ler" polo que "asinaba o contrato e xa".
Do mesmo xeito que os empregados que prestaron declaración nas pasadas xornadas, os traballadores que compareceron este mércores incidiron en que a forma de lograr os postos de traballo foi mediante chamadas do Inem ou presentándose, propiamente, ás prazas que estaban anunciadas tanto nos taboleiros do Concello como a través de medios de prensa de tirada provincial.
Coincidiron nestas afirmacións obreiros, pintores, membros do servizo de axuda a domicilio, integrantes da brigada de limpeza, tres auxiliares administrativos e un xardineiro. Todos manifestaron ser indefinidos desde distintos anos, sen lembrar con exactitude desde cales.
Do mesmo xeito que en vistas anteriores, ratificaron que comezaban con contratos de duración anual e que, "cos anos", fixéronos indefinidos, pero diferiron en como pasaban de contratos anuais a seguir mantendo o mesmo posto. Algúns indicaron que "cada ano había un proceso selección novo con tribunal", mentres que outros se limitaron a lembrar "asinaba prórroga tras prórroga e xa".
A primeira das testemuñas, que continúa traballando para o Concello de Carballiño, manifestou non poder saber nada sobre os contratos polos que preguntaba Fiscalía posto que "case non sabía ler". "E agora sei ler pouco, asinaba e xa", expuxo. Na mesma liña mantívose a segunda testemuña. Recoñeceu que sabe ler pero admitiu que, a pesar diso, "nunca" leu "os contratos". "Cando me dixeron que era indefinido celebreino, e xa asinei", engadiu.
No caso dun dos obreiros e pintores, xa xubilado, asegurou que se atopaba nas listas do Inem desde onde o chamaron para o posto no concello. "Chamáronme pola mañá e á tarde xa entrei a traballar porque tiñan unha urxencia", afirmou. O que supuxo que a fiscal reprochase "unha urxencia de pintura, claro".
DESPEDIMENTOS IMPROCEDENTES
Tres das testemuñas chamadas este mércores a declarar foran despedidos dos seus postos na Casa Consistorial entre os anos 2011 e 2021, coincidindo un cambio de goberno local. Non recibiron explicacións ou causas xustificadas aos seus despedimentos polo que os impugnaron.
O tres gañaron o xuízo por despedimento improcedente e tiveron que ser readmitidos, ademais de recibir unha indemnización. Só un dox tres non se reincorporou ao concello por decisión propia. Os outros manteñen o contrato indefinido.
