Segue a división na CEG que nin se pon de acordo para fixar as novas eleccións tras cinco anos de crise
A patronal mantén a data do 15 de xaneiro "pola urxencia do momento" e xa que é "máis necesario que nunca" ter presidente.
Por Europa Press / Redacción | SANTIAGO DE COMPOSTELA | 02/12/2020 | Actualizada ás 20:12
A crise interna da confederación de empresarios de Galicia (CEG) lonxe de arranxarse, agudizase. Non hai acordo entre as distintas confedeacións e entidades e algúns delas, especialmente, de Pontevedra din que fai falta máis tempo para celebrar unhas eleccións tras a saída do último presidente, que durou dous días á fronte do cargo por dúbidas sobre como se desenvolveu o proceso.
Este martes, membros da xunta de vicepresidentes expuxeron o 15 de xaneiro, pero, segundo fontes consultadas por Europa Press, algunhas asociacións consideran que é demasiado pronto para lograr unha figura de consenso que estea disposta a dar o paso e advirten que os estatutos marcan un prazo de 40 días para convocalas.
Respecto diso, subliñan que teñen que ser os órganos de goberno competentes, xunta directiva e comité executivo, quen tome a decisión e, de non ser así, ameazan con impugnar os comicios.
Pola súa banda, a CEG mantén a data do 15 de xaneiro e defende non aprazala "pola urxencia do momento" e xa que, debido á situación económica, é "máis necesario que nunca" contar cun presidente. Este mércores, varias sectoriais mantiveron unha reunión na que abordaron un documento para analizar e a partir do cal tomarán unha decisión "nuns días", de acordo coas fontes consultadas.
EN CRISE DESDE 2015
A patronal galega arrastra conflitos por enfrontamentos internos desde antes de 2015, cando o vigués José Manuel Fernández Alvariño deixou a presidencia. Desde entón, dimitiron outro tres presidentes: Antón Dieter Moure, que durou menos dun ano; Antón Arias, tras un ano; e José Manuel Díaz Barreiros, a semana pasada, apenas 48 horas despois de ser elixido por aclamación.
Díaz Barreiros, que descarta volver presentarse, tiña como rival a Pedro Rei pero ambos chegaron a un acordo cinco minutos antes da asemblea electoral, polo que non houbo votación. Con todo, 54 vogais emitiran xa o seu sufraxio de forma telemática.
