O prezo do leite galego segue á cola do país aínda que repunta en outubro
En concreto, é a única comunidade peninsular na que se paga menos de 33 céntimos por litro de leite. Está un céntimo por baixo da media estatal, que se eleva ata os 33,7 céntimos.
Por Europa Press / Redacción | SANTIAGO DE COMPOSTELA | 04/12/2020 | Actualizada ás 14:28
O prezo do leite que venden os gandeiros galegos repuntou en outubro ata os 32,7 céntimos --por encima dos 32 céntimos de setembro--, segundo os datos publicados polo Ministerio de Agricultura.
Este é o maior prezo de 2020, de forma que se volve a cifras coas que se pechou o 2019. Con todo, segue á cola do que paga en España.
En concreto, é a única comunidade peninsular na que se paga menos de 33 céntimos por litro de leite. Está un céntimo por baixo da media estatal, que se eleva ata os 33,7 céntimos.
Deste xeito, a media de subida española en outubro (de 0,8 céntimos) respecto de setembro é lixeiramente superior á galega (+0,7 céntimos).
A seguinte comunidade na que menos se paga aos produtores despois de Galicia é Baleares (32,9 céntimos). Son cifras afastadas dos máis de 35 céntimos que se pagan por litro en Asturias (35,6 céntimos), País Vasco (35,5 céntimos) e Andalucía.
PRODUTORES, Á BAIXA
Mentres, os produtores galegos que fan entregas seguen á baixa, quedan en 6.824, 33 menos que en setembro, nun 2020 no que se baixou por primeira vez dos 7.000 gandeiros.
Pola súa banda, a produción no décimo mes incrementouse ata as 236.935 toneladas, unhas 6.400 toneladas máis que no mes de setembro.
