Por Europa Press / Redacción | A CORUÑA | 04/12/2020 | Actualizada ás 18:55
O alcalde de Sada, Benito Portela, expresou a súa satisfacción polo auto do Xulgado de Primeira Instancia número 1 da Coruña polo que se mantén a data de entrega do pazo de Meirás para o 10 de decembro, á vez que insta a abrir as portas do inmoble, unha vez entregado, á "maior brevidade posible".
Por outra banda, informa que o Goberno convocou a este concello e outras administracións a un encontro o día 9 "para acordar o destino e usos do pazo".
"Hai días o Concello de Sada pediu por carta, tanto ao goberno do Estado como as outras administracións (Xunta e Deputación) a necesidade dun acordo conveniado para a xestión e réxime do pazo".
"O Goberno atende agora esta petición e estou seguro que o máis axiña posible o pazo de Meirás abrirá as súas portas á cidadanía", sinala. De cara á reunión, avanza que está disposto a "asumir a xestión conveniada da apertura e visitas" ao inmoble.
A CORUÑA VE LEXÍTIMO QUE O GOBERNO ADMINISTRE MEIRÁS
O Concello da Coruña trasladou a súa satisfacción polo auto da titular do Xulgado de Primeira Instancia número 1 da Coruña, que prohibe á familia Franco levar bens do interior do pazo de Meirás, con excepción dos persoais ou os que non comprometan os usos definitivos do inmoble.
Nun comunicado, o goberno local destaca o feito de que a maxistrada rexeitase todas as alegacións presentadas polos Franco e aceptase as peticións da Avogacía do Estado para concederleel depósito dos bens.
O concelleiro da Coruña de Educación e Memoria Histórica, Jesús Celemín, celebra esta decisión xudicial e considera "lexítimo que a Administración central sexa a depositaria". Tamén destaca que se trataba dunha determinación "urxente" ao facerse público que os herdeiros ían baleirar " o inmoble".
Pola súa banda, a alcaldesa, Inés Rey, sinala que "unha vez máis se fai xustiza" e lembra que o Concello da Coruña "segue loitando para que devolvan a Casa Cornide ao pobo".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.