Por Europa Press / Redacción | SANTIAGO DE COMPOSTELA | 07/12/2020 | Actualizada ás 13:32
A viceportavoz parlamentaria do BNG, Olalla Rodil, considerou acelerada a desescalada das restricións para facer fronte á covid-19 propostas pola Xunta e o secretario xeral do PSdeG, Gonzalo Caballero, reclamou responsabilidade ao presidente galego, Alberto Núñez Feijóo, neste transcurso.
Nunha rolda de prensa ofrecida na Cámara galega este luns, Olalla Rodil denunciou a "improvisación" coa que, en opinión do BNG, está a actuar o Goberno galego nos últimos meses". "É necesario acertar en todo este proceso no que estamos inmersas para non tropezar de novo na mesma pedra que na primeira onda e que poida haber unha terceira", afirmou.
Neste sentido, avogou por fortalecer a atención primaria con recursos humanos e económicos e pór en marcha medidas preventivas que eviten que poida volver producirse algo como o visto nestes meses. "Porque sabemos cales son as consecuencias de volver cometer os mesmos erros", argumentou para lembrar que a segunda onda xa superou o número de persoas falecidas da primeira.
EVITAR REBROTES
Pola súa banda, o secretario xeral do PSdeG, Gonzalo Caballero, chamou ao presidente da Xunta, Alberto Núñez Feijóo, á responsabilidade e manifestou que o proceso de desescalada debe de ser compasado por "decisións prudentes no ámbito privado" e "ambiciosas no público".
"Necesitamos loitar para evitar que ao longo das próximas semanas poidan existir rebrotes que poñan en dúbida a senda de contención", afirmou noutra rolda de prensa celebrada este luns no Parlamento de Galicia, na que volveu a reclamar que se reforce o sistema de rastrexo de casos.
Así mesmo, instou ao Goberno galego a ser "transparente" e facilitar a información para avanzar "á beira dos concellos e dos alcaldes". Ademais, criticou as distintas opinións dadas polo presidente da Xunta sobre as medidas para o Nadal. "Está a xogar coa opinión pública", censurou Gonzalo Caballero, que volveu a apelar á "responsabilidade" e lembrou que, de cara a esas celebracións, o Goberno de España establece "grandes pautas" e o Goberno da Xunta debe de ser "corresponsable".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.