O BNG e o PSdeG reclaman que o pazo de Meirás sirva para recuperar a memoria democrática

A portavoz nacional do BNG, Ana Pontón, e o secretario xeral do PSdeG, Gonzalo Caballero, coincidiron en cualificar de "histórica" a entrega provisional este xoves do pazo de Meirás ao Estado. Tamén expuxeron que o inmoble debe servir para "a recuperación da memoria democrática".

En declaracións aos xornalistas, Pontón manifestou que a entrega do pazo representa "un día importante para a dignidade de Galicia e a recuperación da memoria democrática". En particular, agradeceu "a todas as entidades e persoas que estiveron detrás desa reclamación" o seu labor. "A sociedade civil galega foi quen abriu este debate e quen deu unha batalla política moi importante", reivindicou.

Apelando á colaboración entre as institucións, manifestou que o "pobo galego" é "o verdadeiro propietario" e, por iso, reclamou a transferencia do inmoble a Galicia cunha xestión consorciada e participación na mesma da Xunta, a Deputación da Coruña e o Concello de Sada, así como do tecido asociativo.

CRITICAS AO PP

Pola súa banda, o secretario xeral do PSdeG, Gonzalo Caballero, coincidiu en cualificar de "histórica" a xornada deste xoves e remarcou o feito de que o inmoble se recupere ao servizo "do público".

Tamén apelou a "recuperar a memoria democrática", ao facer referencia aos posibles usos, de forma que o inmoble deixe de ser un lugar de "exaltación do franquismo". Neste sentido, remarcou o labor do goberno de Sánchez, que contrapuxo á do PP cando gobernou a nivel central, e á do propio Feijóo. "Tivo que chegar un goberno progresista para que a Avogacía do Estado fixese un traballo serio e rigoroso, xurídicamente moi solvente", manifestou.