Infraestruturas licitará o plan de saneamento por 1,7 millóns mentres a oposición pide "o rescate das rías"
O BNG demanda sacar da ría de Pontevedra "a peste de Ence", e din que non hai "mellor" proxecto tractor que presentar a fondos europeos a rexeneración destas zonas naturais no canto de apoiar ás "empresas do IBEX".
Por E.P. | SANTIAGO DE COMPOSTELA | 10/12/2020 | Actualizada ás 18:37
A conselleira de Infraestruturas, Ethel Vázquez, avanzou que a próxima semana licitarase o novo plan de saneamento por 1,7 millóns de euros.
Deste xeito, vaise a actualizar o plan de saneamento vixente, elaborado hai dúas décadas para adaptalo a novos desafíos como o cambio climático.
Así, analizarase a situación actual e elaboraranse unhas directrices metodolóxicas e técnicas para despois redactar o Plan Galego de Saneamento.
Este documento buscará afrontar a xestión dos sistemas de saneamento e depuración, con atención a aspectos como sustentabilidade, ecosistemas fluviais e fomento do modelo circular.
O BNG RECLAMA O "RESCATE" DAS RÍAS
No pleno deste xoves, o deputado do Bloque Luís Bará reclamou nunha interpelación un plan integral "de rescate" para o saneamento das rías, o cal conte con colaboración de entidades científicas e universidades galegas.
Ademais de demandar sacar da ría de Pontevedra "a peste de Ence", Bará dixo que non hai "mellor" proxecto tractor que presentar a fondos europeos que a rexeneración destas zonas naturais no canto de apoiar ás "empresas do IBEX".
En resposta, Ethel Vázquez expuxo que "nunca tivo Galicia un goberno con tanto compromiso no saneamento das rías".
Así, a conselleira apunta a un investimento con 1.100 millóns por parte da Xunta en saneamento para levar a cabo 300 actuacións nos últimos anos en 165 concellos, dos cales 600 millóns son para as rías.
Despois de lembrar que a Xunta apoia a concellos a pesar de que o abastecemento e o saneamento son competencias municipais, Ethel Vázquez afirmou: "Estamos a deixarnos a pel, deixando a pestana".
