Por E.P. | SANTIAGO DE COMPOSTELA | 10/12/2020 | Actualizada ás 19:04
Galicia supón o 0,06% das emisións mundiais de gases de efecto invernadoiro, segundo as cifras que achegou este xoves no pleno do Parlamento autonómico a conselleira de Medio Ambiente, Ángeles Vázquez.
O socialista Pablo Arangüena, quen interpelou á titular do departamento pola estratexia da Xunta fronte ao cambio climático, tachou o dato de "disparate" e instou á conselleira a revisar as súas cifras.
Fontes de Medio Ambiente sinalan que España, en conxunto, achega en torno ao 6% das emisións de todo o planeta. En canto á cifra galega, precisan que aínda inclúe a actividade das plantas térmicas de Meirama e As Pontes, a día de hoxe inactivas.
En calquera caso, Arangüena acusou ao Goberno galego de facer unha política "de lavado de cara ambiental" ante a "maior ameaza" que afronta a humanidade, tras "maquillar" a estratexia de cambio climático que "sacou dun caixón" no ano 2019.
"PASAR Á ACCIÓN"
"Imos máis aló de meras declaracións. Pasar á acción foi o que fixo Galicia", asegurou Ángeles Vázquez, tras reivindicar o traballo de máis de 300 profesionais na mencionada estratexia e antes de referirse a unha cifra de "máis de 1.250 millóns de euros" de investimento para combater o cambio climático.
Ademais, entre outras cifras, a responsable de Medio Ambiente fixou nun 1,7% a diminución das emisións en 2018 respecto de 2017 e situou a Galicia entre o tres comunidades que máis as diminuíron desde 1990.
Neste sentido, apelou a un "avance" cara á neutralidade climática ao reducir, de acordo cos seus números, máis de medio millón de toneladas de gases de efecto invernadoiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.