Xorde un novo partido político reivindicando os 500 anos da petición dos nobres galegos ao rei español
Os impulsores do proxecto din que é unha forza "moderada e galeguista" na que están implicadas persoas de "50 concellos".
Por Galicia Confidencial | Compostela | 10/12/2020 | Actualizada ás 21:03
Este ano fanse os 500 anos da Asemblea de Melide, un encontro ao que acudiron os principais nobres galegos como reacción política ao que interpretaran como un desaire do emperador Carlos I de España por telos excluído das Cortes convocadas en Santiago. Entón, vintecinco nobres, poderosos e representantes das cidades e vilas do Reino de Galicia xuntáronse en Melide para pedirlle ao monarca español o retorno do voto en Cortes para o país, que exercía a cidade de Zamora, xunto con outras importantes reivindicacións.
Precisamente, e aproveitando esta efeméride, un grupo de persoas anuncia que presentará o vindeiro sábado 12 de decembro neste concello un novo partido político galego. "Este mes de decembro será unha data para facer historia política, tanto polo lugar Melide pola súa connotación coa historia de Galicia, como pola data no mes conmemorativo do 500 aniversario da Asemblea de Melide", apuntan nun comunicado.
Esta forza, que se presenta o sábado, é, din "o parto con duración de nove meses", froito do debate e análise "dunha equipa de persoas de arredor de 50 concellos, que estiveron traballando en rede como tocou vivir neste tempo de confinamento". Unha nova formación que chega a case tres meses da disolución de En Marea.
"Este proxecto que vai dar moito que falar e chega para quedarse, pois está deseñado conforme a idiosincrasia propia do pobo galego; a moderación e o galeguismo", indican os impulsores. Este sábado taén se darán a coñecer os membros da Comisión Permanente e a Comisión Xestora que o van conducir ate o Congreso Constituínte que terá lugar nos vindeiros meses.
