Sanidade pospón a decisión sobre a apertura da cidade da Coruña á próxima semana

A cidade da Coruña é, das urbes galegas con limitación de mobilidade, a que presenta uns datos epidemiolóxicos que a sitúan máis "próxima á apertura" do seu peche perimetral, que se prolonga desde finais do mes de outubro, aínda que esta decisión non se tomou aínda en base a criterios de "prudencia" e aprazouse ata a próxima reunión do organismo.

Así o explicou este mércores, durante unha rolda de prensa, o conselleiro de Sanidade, Julio García Comesaña, que repasou a situación das grandes cidades galegas e as medidas adoptadas polo comité clínico este martes.

Tamén a alcaldesa da Coruña, Inés Rey, manifestou que a menor incidencia de casos na cidade avala que "se fixo ben", apuntou ao destacar o cumprimento das normas para frear a incidencia do Covid, aínda que instou a "non baixar a garda". "É das cidades de Galicia a que menor incidencia de Covid ten, estamos a falar de 117 casos por cada 100.000 habitantes cunha poboación de 248.000", apuntou.

De entre as urbes, Comesaña destacou o caso da Coruña, onde a tendencia é "moi favorable" e "próxima xa á apertura". Con todo, por un "criterio de precaución", decidiuse non executar esta medida esta semana e "pospor a apertura" ao comité clínico do próximo luns, 21 de decembro, que volverá analizar os datos. Parte desta decisión está motivada pola mala evolución que rexistrou nos últimos días Santiago, que tivo que ser de novo perimetrada. Sanidade busca que unha apertura precoz non empeore os resultados e obrigue a tomar medidas en pleno Nadal.

Ao este caso tamén se referiu o presidente da Xunta, Alberto Núñez Feijóo, que, tras reunirse co presidente da Deputación de Ourense, advertiu de que a Administración sanitaria seguirá "vixiando" a cidade de Ourense, onde tamén empeorou a situación, aínda que non hai "un repunte tan importante" como na capital galega.

GALICIA, EN TENDENCIA "ESTABLE ASCENDENTE"

Segundo informou durante a rolda de prensa a directora xeral de Saúde Pública, Carmen Durán, Galicia atópase nunha "tendencia estable ascendente", que obriga a "estar vixiantes". A incidencia a 14 días é de 167,48 casos por 100.000 habitantes e de 85 casos a sete días, cunha "estabilidade" que, de todos os xeitos, é "crecente". O índice reprodutivo está, así mesmo, por encima dun. Nos puntos favorables, Carmen Durán mencionou a porcentaxe de positividade, o 5,7 das probas realizadas.

En canto ás cidades, obsérvase unha "melloría na incidencia acumulada" da Coruña, especialmente, Lugo, e Vigo, que pasou de ter unha taxa de 193 casos por 100.000 habitantes a 14 días a 165. Ferrol mantense "estable", con "tendencia descendente", xa que "evoluciona lento pero favorable", e Ourense incrementou a incidencia acumulada, aínda que non na magnitude de Santiago, polo que, polo momento, seguirá aberto. En Pontevedra hai un "pequeno repunte", pero Sanidade destaca a "estabilidade".

Probablemente "o concello que máis preocupa" a Sanidade é Santiago, que experimentou un importante repunte nos últimos días, pasando de 70 casos o 4 de decembro aos 138,8 por 100.000 habitantes do último informe. Tendo en conta as distintas variables, a Xunta decidiu que regrese á limitación de mobilidade perimetral, que se volverá a analizar o vindeiro luns.

PREOCUPACIÓN POR BARBANZA, XALLAS, DEZA E SALNÉS

A maiores, Carmen Durán referiuse tamén á evolución noutras áreas nas que se incrementaron as restricións. No caso de Barbanza, Ribeira tívose que unir ás restricións de Boiro por "un incremento importante de casos na última semana". Se a semana pasada tiña 24 acumulados a 14 días, esta son preto de 80. Na comarca de Xallas, Sanidade alerta dun "incremento importante" de casos en Mazaricos e Santa Comba. Concretamente esta última con 46 casos a 14 días, 10 máis que a semana anterior.

En O Deza, a preocupación é por Rodeiro, cun "goteo continuo de casos", que "case triplican os que tiña hai unha semana a 14 días", e no Salnés incrementáronse restricións en áreas como A Illa, con 38 casos nos últimos 14 días. Dentro dos lugares que se atopan "en vixilancia", a directora xeral nomeou a comarca de Valdeorras, coa Rúa e O Barco que "seguen incrementando casos" e un empeoramento en Verín.

Pola contra, Durán eloxia "evolucións moi favorables" como a de Barro, con "ningún caso no últimos sete días" e "só un nos últimos 14". Tampouco tiveron casos a sete días Coristanco nin Laxe e en Carballo detectáronse só seis.