A folga en Siemens-Gamesa continuará tras decidilo os traballadores
Votaron tamén a favor de desenvolver un piquete ao longo de todo o fin de semana ante a planta e o centro loxístico situado nas súas inmediacións para evitar o movemento de pas de aeroxerador que eles mesmos fabrican.
Por E.P. | SANTIAGO DE COMPOSTELA | 17/12/2020 | Actualizada ás 17:58
Os traballadores da multinacional Siemens Gamesa nas Somozas decidiron nunha asemblea celebrada no mediodía deste xoves continuar coa folga que iniciaron o pasado luns e que cumpriu o seu cuarto día consecutivo.
Así o asegurou o presidente do comité de empresa, Sergio López (UGT), manifestou que a maioría de operarios decidiron non acudir este venres aos seus postos de traballo.
Ademais, votaron tamén a favor de desenvolver un piquete ao longo de todo o fin de semana ante a planta e o centro loxístico situado nas súas inmediacións para evitar o movemento de pas de aeroxerador que eles mesmos fabrican.
Durante este xoves os traballadores volvéronse a concentrar nestes mesmos lugares e non cortaron o acceso ao polígono industrial, tal e como realizaran nas dúas primeiras xornadas de paro, cando instalaran barricadas e colocado sobre o asfalto outros obxectos que impediron o paso de camións e vehículos.
Segundo o calendario laboral para este ano 2020 os traballadores deberían de empezar as vacacións de Nadal desde o 23 de decembro.
CONSELLO DE ADMINISTRACIÓN
Os traballadores da planta situada en Ferrolterra están moi pendentes do que pode decidir o consello de administración de Siemens Gamesa xa que, segundo a información que manexan, este órgano ten previsto reunirse ao longo da xornada deste xoves, descoñecendo a hora e o lugar.
Mentres, os traballadores da planta das Somozas, uns 240 a día de hoxe, tras despedir hai unhas semanas a 59, non descartan endurecer as accións de protestas e levalas mesmo a fóra da localidade.
Por outra banda, compañeiros doutras plantas de Siemens Gamesa repartidas por diversas localidades do país concentráronse ás portas dos seus centros de traballo, portando pancartas de apoio e reclamando á dirección que se non execute un hipotético peche, como foi o caso de Munguía (Biscaia), Conca, ou San Fernando de Henares (Madrid).
