Por E.P. | SANTIAGO DE COMPOSTELA | 18/12/2020 | Actualizada ás 18:57
O BNG e o PSOE pactaron un orzamento no Concello de Pontevedra de 80,7 millóns de euros para 2021, que será o "máis alto da historia" en prol da "reactivación económica".
O alcalde de Pontevedra, Miguel Anxo Fernández Lores (BNG), e o tenente de alcalde, Tino Fernández (PSOE), presentaron este venres en rolda de prensa o proxecto de orzamento municipal, que será a primeira fase dun plan económico que o Concello porá en marcha o ano que vén.
As contas do Concello de Pontevedra para o 2021 elévanse ata os 80,7 millóns de euros, aínda que a previsión que manexa o alcalde nunha segunda fase é que no primeiro trimestre do ano se aprobe a liquidación das contas do 2020, o que permitiría incorporar os remanentes, que suporán outros 20 millóns. Este incremento permitirá aumentar o capítulo destinado a investimentos no orzamento, que é agora é de 12,9 millóns de euros.
Nunha terceira fase deste plan económico, se se suman os convenios con outras administracións e as actuacións incluídas na adxudicación a Viaqua do contrato da auga, o Concello de Pontevedra disporía en total duns investimentos para o próximo ano que "roldarán os 100 millóns de euros", o que xerará ao redor de 2.000 postos de traballo.
"Consideramos que todas as administracións, e o Concello o primeiro, teñen que facer un esforzo para inxectar diñeiro na economía, porque é a maneira de xerar emprego e riqueza para saír desta crise", dixo o alcalde. O tenente de alcalde, Tino Fernández, subliñou que acordo alcanzado con este orzamento "expansivo" demostra que son "un goberno engraxado, que funciona ben".
O borrador do orzamento será presentado a próxima semana ao grupo municipal do Partido Popular e ao concelleiro non adscrito, Goyo Revenga, coa previsión de que poida ser aprobado no pleno do mes de xaneiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.